जळगाव (प्रतिनिधी) धरणाजवळ गुरे चारत असताना अचानक वीज कोसळल्याने त्र्यंबक ओंकार अस्वार (बारी) (वय ७१, रा. शिरसोली प्र.न, ता. जळगाव) हे जागीच ठार झाले. याचवेळी त्याठिकाणी चरत असलेली म्हैस देखील दगावली. ही घटना जळगाव तालुक्यातील शिरसोली शिवारातील नायगाव धरणाजवळ मंगळवारी पावणे तीन वाजेच्या सुमारास घडली. याप्रकरणी एमआयडीसी पोलिसात अकस्मात मृत्यूची नोंद करण्यात आली आहे.
जळगाव तालुक्यातील शिरसोली प्र. न येथील रहिवासी असलेले त्र्यंबक अस्वार हे शेतीसह पशूपालन करुन आपल्या कुटुंबाचा उदनिर्वाह करीत होते. मंगळवार दि. २० रोजी दुपारी शिरसोली शिवारातील नायगाव धरणाजवळ असलेल्या शेतात गेले होते. त्याठिकाणी गुरे चारत असतांना दुपारच्या सुमारास अचानक विजांच्या कडकडाटासह पाऊस सुरू झाला. यावेळी अस्वार यांच्या अंगावर वीज कोसळली आणि यामध्ये त्यांचा जागीच मृत्यू झाला. या सोबतच त्यांच्या शेजारीच असलेली एक म्हैसही दगावली.
गुरे चारणाऱ्यांच्या लक्षात आली घटना !
ही घटना काही अंतरावर असलेल्या गुरे चारणाऱ्यांच्या लक्षात आली. त्या वेळी त्यांनी ही माहिती कुटुंबीय व ग्रामस्थांना दिली. त्यांनी घटनास्थळी धाव घेवून अस्वार यांना शासकीय वैद्यकीय महाविद्यालय व रुग्णालयात दाखल केले. याठिकाणी वैद्यकीय अधिकाऱ्यांनी तपासणी करीत अस्वार यांना मयत घोषीत केले.
कुटुंबियांचा मनहेलावणारा आक्रोश !
घटनेची माहिती मिळाल्यानंतर त्र्यंबक अस्वार यांच्या कुटुंबियांसह नातेवाईकांनी शासकीय वैद्यकीय महाविद्यालय व रुग्णालयात धाव घेतली. याठिकाणी कुटुंबातील महिला व अन्य सदस्यांनी मोठा आक्रोश केला. त्यांच्या पश्चात पत्नी, मुलगा, सून, चार मुली, जावई, भाऊ असा परिवार आहे.
