भिवंडी (वृत्तसंस्था) आई-वडिलांचा आधार नसलेल्या एका १४ वर्षीय शेळ्या चारायला जंगलात गेलेल्या मुलीवर तिच्या मालकाने अत्याचार केल्याची धक्कादायक घटना उघडकीस आली आहे. गेल्या कित्येक महिन्यांपासून तो तिच्यावर अत्याचार करत होता. श्रमजीवी संघटनेच्या कार्यकर्त्यांच्या मदतीने पीडितेने पोलिसांत तक्रार दाखल केली. त्यानंतर पोलिसांनी तातडीने आरोपीला अटक केली
मिळालेल्या माहितीनुसार, भिवंडीमधील गणेशपुरी पोलीस ठाण्याच्या हद्दीत ही धक्कादायक घटना घडली. ३२ वर्षीय व्यक्तीने एका १४ वर्षीय मुलीवर अत्याचार केले. गेल्या अनेक महिन्यांपासून आरोपी तिच्यावर अत्याचार करत होता. पीडित मुलगी एकटीच असते. तिच्या वडिलांचे निधन झाले असून, तिची आई तिला सोडून गेली आहे. ती शेळ्या चारण्यासाठी जंगलात गेल्यावर आरोपीने तिच्यावर अत्याचार केले. याबद्दल कुठेही वाच्यता करू नको, असे सांगत तिला धमकावले.
आरोपीचा स्वतःचा व्यवसाय आहे. त्याच्याकडे स्वतःच्या शेळ्या आहेत. गेल्या सहा वर्षांपासून आरोपी आणि त्याची पत्नी तिचा सांभाळ करत होता. मुलगीही त्यांच्या घरातील कामात मदत करायची. त्यांच्या शेळ्या चारायला घेऊन जात असे. काही महिन्यांपूर्वी आरोपीची वाइट नजर तिच्यावर पडली. जंगलात गेलेली मुलगी एकटी असल्याचे पाहून त्याने गैरफायदा घेतला. तिथे तिच्यावर अत्याचार केले. त्यानंतर तो तिला धमकावून वारंवार अत्याचार करत होता, अशी माहिती मिळाली आहे.
पोलिसांच्या माहितीनुसार, आरोपी पीडित मुलीवर वारंवार अत्याचार करत होता. हे सगळे असह्य झाल्याने पीडितेने सगळा प्रकार तिच्या मैत्रिणीला सांगितला. तिची मैत्रीण सज्ञात असून, तिने याबाबत थेट आरोपीच्या पत्नीला विचारणा केली. तिच्यासोबत वाद घातला. तसेच या प्रकाराबाबत श्रमजीवी संघटनेच्या कार्यकर्त्यांना सांगितलं. त्यांच्या मदतीने पीडितेने पोलिसांत तक्रार दाखल केली. त्यानंतर पोलिसांनी तातडीने आरोपीला अटक केली. त्याच्याविरोधात गुन्हा दाखल केला आहे. याप्रकरणी पुढील तपास सुरू आहे.
