जळगाव (प्रतिनिधी) रस्त्याने पायी जात असलेल्या दिलीप जोरसिंग राठोड (वय ४५, रा. रामनगर) यांच्या अंगावर दुचाकीस्वार महेंद्र मधुकर साळुंखे (रा. मेस्को माता नगर) या मूकबधीराने ज्लवनशील पदार्थ टाकला. यामुळे ते गंभीररित्या भाजले गेले असून त्या दुचाकीस्वाराच्याही चेहऱ्यावर हा पदार्थ उडाल्यामुळे तो देखील जखमी झाला. ही घटना दि. ३ सप्टेंबर रोजी मेहरुण स्मशानभूमीजवळ घडली. या प्रकरणी मूकबधीराविरुद्ध एमआयडीसी पोलिस ठाण्यात गुन्हा दाखल करण्यात येऊन त्याला अटक करण्यात आले. त्याला दि. ५ सप्टेंबरपर्यंत पोलिस कोठडी सुनावण्यात आली आहे.
शहरात मजुरी काम करणारे दिलीप राठोड हे दि. ३ सप्टेंबर रोजी मेहरुण स्मशानभूमी परिसरातून पायी जात होते. त्या वेळी दुचाकीस्वार महेंद्र साळुंखे हा मूकबधीर त्यांच्याजवळ आला, त्याने बाटलीमधील ज्वलनशील पदार्थ राठोड यांच्या चेहऱ्यावर, छाती, मान व हातावर फेकले. यामुळे ते भाजले गेल्याने त्यांना गंभीर दुखापत झाली. ज्वलनशील पदार्थ फेकताना ते दुचाकीस्वार साळुंखे याच्याही चेहऱ्यावर उडाले. त्यामुळे त्याच्याही चेहऱ्यावर जखमा झाल्या आहेत. घटनेनंतर तो तेथून पळून गेला तर जखमी राठोड यांना शासकीय वैद्यकीय महाविद्यालय व रुग्णालयात दाखल करण्यात आले असून त्यांच्यावर उपचार सुरु आहे.
या प्रकरणी त्यांनी एमआयडीसी पोलिस ठाण्यात दिलेल्या फिर्यादीवरून महेंद्र साळुंखे याच्याविरुद्ध गुन्हा दाखल करण्यात आला आहे. पुढील तपास पोउनि संजय पाटील करीत आहे. या प्रकरणी साळुंखे यास अटक करण्यात आले असून त्यास ५ सप्टेंबरपर्यंत पोलिस कोठडी सुनावण्यात आली. तो मूकबधीर असल्याने तपासासाठी पोलिसांनी प्रश्नावली तयार केली असून संशयिताकडून अधिक माहिती जाणून घेण्यासाठी मूकबधीर शाळेच्या शिक्षकांची मदत घेतली जात आहे. त्यातून त्याने हे कृत्य का केले, त्याचे साथीदार, सूत्रधार कोण आहे, याची माहिती समोर येणार आहे.
