पाटणा (वृत्तसंस्था) बिहारची राजधानी पाटाण्यातील फुलवारी शरीफ येथे चार जणांनी पोलीस असल्याची बतावणी करून अल्पवयीन मुलीचे आधी फोटो काढले आणि मग तरुणीवर बलात्कार केल्याची घटना समोर आली आहे. तरुण आणि तरुणीला एकांतात पाहून चौघांनी तिच्यावर अत्याचार केला. दरम्यान, पीडित मुलगी ही अल्पवयीन असल्याची माहिती समोर आली आहे.
पीडित तरुणीने सांगितले की, तिच्या मित्रासोबत ती बोलत होती त्यावेळी चार तरुण त्यांच्याजवळ आले. आपण पोलीस असल्याचं त्यांनी सांगितलं. त्यानंतर माझ्या मित्राला त्यांनी धमकावलं, आमचे फोटोही काढले आणि मग मित्राला ओलीस ठेवून बलात्कार केला. चौघे आरोपी हे दोन दुचाकींवर तेथे आले होते. या चारही तरुणांनी आम्हाला इथे काय करता म्हणत जाब विचरण्यास सुरुवात केली. मग पोलीस स्टेशनमध्ये नेण्याची धमकी दिली. त्यानंतर त्यांनी आमचे मोबाइलमध्ये फोटो सुद्धा काढले. यानंतर चौघांनी छेड काढण्यास सुरुवात केली असता मित्राने त्यांना विरोध केला. यावेळी त्यांनी तरुण मित्राला ओलीस ठेवलं आणि मग झुडपात नेत तिच्यावर अत्याचार केले.
या प्रकरणी पोलिसांत तक्रार दाखल करण्यात आली आहे. पीडित मुलीच्या वडिलांनी आरोप केला आहे की, चार जणांनी मुलीवर बलात्कार केला. इतकेच नाही तर, मुलीच्या मित्रानेच हा सर्व कट रचला असल्याचाही आरोप त्यांनी केला आहे. पीडित मुलीच्या वडिलांनी दाखल केलेल्या तक्रारीनंतर पोलिसांनी तिच्या मित्राला चौकशीसाठी ताब्यात घेतले आहे. या प्रकरणी पोलीस अधिक तपास करत आहेत.
