पुणे (वृत्तसंस्था) सासरच्या जाचाला कंटाळून जावयाने आत्महत्या केल्याची धक्कादायक घटना पुण्यात घडली आहे. राहत्या घरी बायकोच्या ओढणीने गळफास घेऊन त्याने जीवनयात्रा संपवली. वर्षभरापूर्वीच तरुणाचं लग्न झालं होतं. तरुणाजवळ सुसाईड नोटही सापडली असून त्यात ‘आई, मी पुन्हा तुझ्या पोटी जन्म घेईन’ असं त्याने लिहिलं आहे.
यासंदर्भात अधिक असे की, निखिल धोत्रे असं आत्महत्या केलेल्या तरुणाचं नाव आहे. पुण्यातील शिवाजीनगर-गोखलेनगर भागात तो वास्तव्यास होता. वर्षभरापूर्वीच त्याचं लग्न झालं होतं. निखिलने रविवारी संध्याकाळी राहत्या घरी पत्नीच्या ओढणीने गळफास घेत आयुष्य संपवलं. दरम्यान पोलिसांनी सुसाईड नोट सापडली असून यामध्ये त्याने सासुरवाडीच्या जाचाला कंटाळून आत्महत्या करत असल्याचा उल्लेख केला आहे. तसंच कर्जबाजारी झाल्याचाही उल्लेख केला आहे. निखिलने पत्रात मुख्यमंत्री उद्धव ठाकरे, उपमुख्यमंत्री आणि पुण्याचे पालकमंत्री अजित पवार यांचा उल्लेख केला असून संबंधितांवर कठोर कारवाई करण्याची मागणी केली आहे.
निखिल धोत्रेनं आत्महत्या करण्यापूर्वी लिहिलेल्या चिठ्ठीत आईसाठी भावनिक संदेश आहे. ‘आई तू काळजी करु नकोस. मी पुन्हा तुझ्या पोटी जन्म घेईन. आई, मी समजून माझ्या बाळाला सांभाळ. त्याची काळजी घे,’ असं निखिलनं चिठ्ठीमध्ये लिहिलं आहे. दरम्यान, पण आता या प्रकरणाची आणखी दुसरी बाजू समोर आली आहे. मृतक तरुणाच्या पत्नीने त्याच्या मृत्यूआधी फिनायल पिवून आत्महत्या करण्याचा प्रयत्न केला होता. तिच्यावर पुण्यातील रुग्णालयात उपचार करण्यात आले होते, अशी देखील माहिती समोर आली आहे.
