नांदेड (वृत्तसंस्था) : जिल्ह्यातील बारड इथे ५० हजाराची सुपारी देत आईनेच केला पोटच्या मुलाचा खून केल्याची धक्कादायक घटना उघडकीस आली आहे. 14 ऑगस्ट रोजी बारड पोलीस ठाण्याच्या हद्दीत सुशील नामक युवकाचा खून झाला होता. या प्रकरणी बारड पोलिसांनी छडा लावत या खूनामागे मयताची आईच असल्याचे समोर आलं आहे.
सुशिल श्रीमंगले असं खुन झालेल्याचे नाव आहे. शोभा श्रीमंगले, राजेश पाटील, विशाल भगत असे अटक केलेल्या संशयित आरोपींचे नाव आहे. नांदेडच्या गिता नगर भागात राहणाऱ्या सुशिल श्रीमंगले याचा मृतदेह मुदखेड तालुक्यातील बारड शिवारात सापडला होता. पोलिस तपासात सुशिलचा गळा आवळून खून झाल्याची बाब पुढे आली होती. सुशिल हा आई आणि वडील यांना दारु पिऊन मारहाण करत असे आणि घर विकून पैसे मागत होता.या त्रासाला कंटाळून आईने भाडेकरी असलेल्या राजेश पाटील, विशाल भगत यांना पन्नास हजाराची सुपारी देऊन खुन घडवून आणला असं पाेलिस तपासात समाेर आले आहे. या प्रकरणात संशयितांनी खुनाची कबुली दिली असून बारड पोलिस ठाण्यात गुन्हा दाखल करण्यात आला आहे.
