भंडारा (वृत्तसंस्था) लाखांदूर तालुक्यातील धान रोवणीच्या कामावर मजुरीने गेलेल्या एका शेतमजुराचा चिखलात पडल्याने जागीच मृत्यू झाला. ही घटना रविवारी (२३ जुलै) सायंकाळी उघडकीस आली. संजय रामदास कोटरंगे (४०, रा. लाखांदूर /प्लॉट) असे मृतकाचे नाव आहे.
संजय कोटरंगे हा लाखांदूर येथील दामोदर तोंडरे यांच्या मालकीच्या शेतात रविवारी मजुरीने काम करण्यासाठी गेला होता. काम आटोपून शेतमालक तोंडरे यांच्या पत्नीला घरी जातो, असे सांगून घराकडे निघाला होता. मात्र रात्र होऊनही तो घरी परतला नाही. कुटुंबीयांनी त्याची शोधाशोध केली असता, रोवणीला गेलेल्या शेताच्या रस्त्यावर त्याची सायकल दिसून आली.
नातेवाइकांनी शेतात जाऊन बघितले असता, संजय कोटरंगे हा शेतात पडलेला दिसून आला. उपस्थित नातेवाइकांनी त्यास तत्काळ उचलून ग्रामीण रुग्णालय, लाखांदूर येथे उपचारासाठी दाखल केले. मात्र डॉक्टरांनी त्याला मृत घोषित केले. राहुल कैलास कोटरंगे यांच्या तक्रारीवरून लाखांदूर पोलीस स्टेशन येथे पोलिसांनी मर्ग दाखल केला आहे. याप्रकरणी पुढील तपास लाखांदूर पोलीस करीत आहेत.
