रावेर (प्रतिनिधी) भाजपशी एकनिष्ठ राहूनही आपणास उपसभापतीपदासाठी डावलण्यात येत आहे?, अशी कैफियत मांडत पंचायत समिती सदस्या योगिता वानखेडे ह्या ढसा ढसा रडल्या. खासदार रक्षाताई खडसे व जिल्हा परिषद अध्यक्षा रंजना पाटील यांच्यासमोरच हा सगळा प्रकार घडला.
खासदार खडसे यांच्या हस्ते जुन्या एकात्मिक बालविकास प्रकल्प अधिकारी कार्यालयात स्थलांतरित झालेल्या तालुका वैद्यकीय अधिकारी कार्यालयाचे उद्घाटन झाले. यानंतर पं. स. सदस्या योगिता वानखेडे यांना अश्रू अनावर झाले. भाजपशी एकनिष्ठ राहूनही आपणास उपसभापतीपदासाठी डावलण्यात येत आहे? असे काय चुकले? की अनुसूचित जातीची सदस्य असल्याने आपणास संधी दिली जात नाही? अशी कैफियत मांडत पंचायत समिती सदस्या योगिता वानखेडे ह्या ढसा ढसा रडल्या. अचानक झालेला हा प्रकार पाहून उपस्थित महिला पदाधिकारीही अवाक झाल्या.
यावेळी खासदारांनी ही बाब पक्षाच्या वरिष्ठ नेत्यांच्या अखत्यारीतील असल्याने त्यांच्याशी सविस्तर चर्चा करणार असल्याचे म्हटले. परिस्थितीनुरूप बऱ्याचदा पक्षात काही निर्णय घेतले जातात, असे सांगत समजूत काढली.
