जळगाव (प्रतिनिधी) जिल्हा मध्यवर्ती सहकारी बँकेच्या अध्यक्षपदी माजी मंत्री तथा राष्ट्रवादीचे ज्येष्ठ नेते गुलाबराव देवकर तर उपाध्यक्षपदी शिवसेनेचे शामकांत सोनवणे यांची नावे बैठकीत निश्चित करण्यात आली आहेत. दरम्यान, गुलाबराव देवकर हे जिल्हा बँकेचे अध्यक्ष होतील, असे ‘क्लिअर न्यूज’ने व्यक्त केलेले भाकीत खरे ठरले आहे.
जिल्हा निवडणुकीत राष्ट्रवादीला १०, शिवसेनेला ७, कॉंग्रेसला ३ तर भाजपला एक जागा मिळाली आहे. जिल्हा बँक निवडणुकीच्या निकालानंतर काल महाविकास आघाडीच्या नेत्यांची बैठक अजिंठा विश्रामगृहात झाली होती. यावेळी माजी मंत्री एकनाथराव खडसे यांनी सत्ता वाटपाचा फॉर्म्युला निश्चित केला होता. त्यानुसार पहिले तीन वर्षे राष्ट्रवादी कॉंग्रेसला अध्यक्षपद मिळणार असून नंतरची दोन वर्षे शिवसेनेला अध्यक्षपद मिळणार आहे. तर पहिले दोन वर्ष कॉंग्रेसला, नंतरची दोन वर्षे शिवसेनेला तर एक वर्ष राष्ट्रवादीला उपाध्यक्षपद मिळणार आहे.
दरम्यान, काल खडसे यांनी दिलेल्या माहितीनुसार आज सकाळी जळगाव जिल्हा बँकेत राष्ट्रवादीच्या संचालकांनी बैठक झाली. यात एकनाथराव खडसे यांनी जिल्हा बँकेच्या अध्यक्षपदासाठी माजी मंत्री गुलाबराव देवकर यांचे नाव निश्चीत करण्यात आल्याची माहिती दिली. तर शिवसेनेतर्फे उपाध्यक्षपदासाठी शामकांत सोनवणे यांचे नाव निश्चीत करण्यात आल्याचे सांगितले. आज दुपारी जिल्हा बँकेच्या अध्यक्षपदाच्या निवडीत गुलाबराव देवकर आणि शामकांत सोनावणे अर्ज भरणार असून त्यांची बिनविरोध निवड होणार असल्याचे स्पष्ट झाले आहे.
दरम्यान, जिल्हा मध्यवर्ती बँकेच्या चेअरमन पदासाठी माजी पालकमंत्री गुलाबराव देवकर यांच्या नावाला पक्षातील सर्वात वरिष्ठ नेत्यांची संमती मिळाल्याची माहिती सूत्रांनी दिल्याबाबतची पोस्ट राष्ट्रवादीचे प्रदेश प्रवक्ते योगेश देसले यांनी टाकली होती. यामुळे जळगाव जिल्हा बँकेच्या चेअरमन पदासाठी गुलाबराव देवकर यांचे नाव निश्चित झाल्याचे तेव्हाच स्पष्ट झाले होते. त्यामुळे योगेश देसले यांची पोस्ट खरी ठरल्याचे दिसून आले आहे.
