छत्रपती संभाजीनगर (वृत्तसंस्था) भाऊबीजेसाठी बहिणीच्या घरी येणाऱ्या भावावर काळाने घाला घातला. कांचनवाडी जवळ दुचाकीला एका अज्ञात वाहनाने चिरडल्याने या दुर्दैवी अपघातात दोघेही जागीच ठार झाले. हा अपघात गुरूवारी रात्री ८ वाजेच्या सुमारास घडला. सुरेश परदेशी (वय ७५) व केशव विठ्ठल भिसे (२३ रा. बालम टाकळी ता. शेवगाव जि. अहमदनगर) अशी अपघातात ठार झालेल्यांची नावे आहेत.
मोटारसायकल स्लिप झाली अन दोघेही पाठीमागून येणाऱ्या वाहनाने चिरडले !
मयत दोघे शेवगाव-पैठण मार्गे छत्रपती संभाजीनगरकडे येत होते. भाऊबीजेच्या सणासाठी शहरात येत असताना कांचनवाडीतील बेंच मार्कसमोर त्यांचा अपघात झाला. समोर जाणाऱ्या मोठ्या वाहनाला ओव्हरटेक करताना अचानक समोरून दुसरी दुचाकी आली. अचानक आलेल्या या दुचाकीने त्यांची मोटारसायकल स्लिप झाली अन दोघेही पाठीमागून येणाऱ्या वाहनाखाली आले. चाकाखाली आल्याने सुरेश परदेशी यांचा जागीच मृत्यू झाला. तर गंभीर जखमी केशव भिसे यांचा उपचारादरम्यान मृत्यू झाला. या अपघाताची माहिती मिळताच सातारा ठाण्याचे पोलिस निरीक्षक अशोक गिरी यांनी पथकासह घटनास्थळी धाव घेतली. वाहतूक सुरळीत करीत मयत आणि जखमींना घाटी रूग्णालयात दाखल करण्यात आले. अपघाताचा पुढील तपास सातारा पोलिसांनी सुरू केला आहे.
बहिणीची भेट झालीच नाही !
केशव भिसे व सुरेश परदेशी हे दोघेही बालम टाकळीचे. सुरेश यांनाही नातेवाईकांकडे छत्रपती संभाजीनगरला जायचे होते. तर केशव भाऊबीजेसाठी बहिणीला घ्यायला जाणार होता. तु चाललाच आहेस तर मलाही सोबत येऊ दे असे सुरेश यांनी केशवला म्हटले. त्यानुसार गुरुवारी दुपारीच दोघेही दुचाकीने बालम टाकळीहून निघाले. केशव याने बहिणीला ताई…मी तुला घ्यायला येतो, असे सांगितले होते. मात्र नियतीने बहिण भावाची भेट होऊच दिली नाही.
मुलीसोबत शेवटचा तो संवाद ठरला अखेरचा !
परदेशी यांच्या सहा मुलींनी शुक्रवारी भाऊबीजेच्या कार्यक्रमाचे नियोजन केले होते. परदेशी यांच्या दोन मुली शहरात, दोन अहमदनगर, एक नाशिक, तर एक श्रीरामपूरला राहते. सर्व मुली, जावई, नातवंडे शुक्रवारी एकत्र येणार होते. त्यासाठी परदेशी गावाकडून निघाल्यानंतर शहरातील मुली त्यांच्यासोबत सातत्याने संपर्कात होत्या. बिडकीनला असताना मुलीने कॉल करून पैठण रस्त्यावर घेण्यास येत असल्याचे सांगितले. परंतु, तो संवाद दोघांमधला शेवटचा ठरला.
