अमळनेर प्रतिनिधी : पैसे पडल्याचे भासवून अडत व्यापाऱ्यांच्या दुचाकीवर लावलेली पैशांची पिशवी लांबवणाऱ्या आरोपीला अवघ्या एका तासात अमळनेर पोलिसांनी अटक करून चोरीस गेलेला पैसा परत मिळवला आहे.
बहादरपूर रस्त्यावरील झामी चौकातील अडत व्यापारी आण्णा साहेबराव महाजन हे २ रोजी दुपारी १२.३० वाजता दुचाकी (एमएच- १९, डीएक्स ४०५७) वर २ लाख ८ हजार रुपये घेऊन बँकेत भरायला गेले होते. १ लाख ३० हजार आयसीआयसीआय बँकेत भरणा केल्यावर ते महाराष्ट्र बँकेत गेले. दुपारी १.५० वाजता ते त्यांच्याजवळील उरलेले ७८ हजार रुपये असलेली पिशवी घेऊन बँकेबाहेर पडले. त्याचवेळी त्यांना एक जणाने पैसे खाली पडल्याचे सांगितले. आण्णा महाजन पैसे उचलायला खाली वाकले तोच त्या व्यक्तीने दुचाकीला लावलेली पिशवी घेऊन पळ काढला.
दरम्यान, घटनेचे वृत्त कळताच पो.नि. दत्तात्रय निकम यांनी शोध पथकाचे पो.उ.नि. शरद काकळीज, हे. कॉ. मिलिंद सोनार, प्रशांत पाटील, उज्ज्वल म्हस्के, विनोद संदानशिव, नितीन मनोरे यांना सीसीटीव्ही फुटेज तपासून आरोपींचा शोध घेण्यास सांगितले. पथकाने फुटेज तपासले असता यात ३ ते ४ आरोपी असल्याचे समजले. आरोपींनी चोपड्याकडे पलायन केल्याचे समजल्यावर शोध पथकाने त्यांचा पाठलाग सुरू केला. तसेच तातडीने चोपडा पोलिसांना संदेश देण्यात आला. तिकडून चोपडा पोलीस वेले गावाजवळ थांबलेले होते. पोलिसांनी त्यांना थांबवून ठेवले. तोपर्यंत अमळनेर पोलिसांनी त्यांच्यावर झडप घातली. अवघ्या एका तासात आरोपींना पकडून त्यांना अटक करण्यात आली. पोलिसांनी खाक्या दाखवताच त्यांनी त्यांची नावे बालु बारगुंडा, शिवकुमार व्यंकटस्वामी बारगुंडा, गणेश शुबरमनी तेली (रा. अमरनगर, उज्जैन, मध्य प्रदेश) अशी सांगितले. अमळनेर पोलीस ठाण्यात तिघांविरुद्ध गुन्हा दाखल करण्यात आला असून तपास हे. कॉ. मिलिंद सोनार करत आहेत.
