धरणगाव (प्रतिनिधी) धरणगाव नगरपालिकेतील एककल्ली कारभार आणि व्यक्तीकेंद्रित राजकारणावर अधून-मधून सोशल मीडियात विरोधकांकडून टीका-टिप्पणी होतच असते. परंतू आज चक्क शिवसेनेचे माजी नगरसेवक तथा शहरप्रमुख अभिजित पाटील यांनी पेव्हर ब्लॉगची कामे, ओपन स्पेसच्या मुद्द्यासह एकूणच पालिकेच्या कारभाराबाबत सोशल मीडियात टाकलेली पोस्ट तुफान व्हायरल होत आहे. कारण धरणगाव नगरपालिकेत शिवसेनेची सत्ता आहे. त्यामुळे पालिकेतील सत्ताधाऱ्यांना हा एकप्रकारे घरचा आहेर समजला जात आहे.
शिवसेनेचे माजी नगरसेवक तथा शहरप्रमुख अभिजित पाटील हे शांत तसेच मितभाषी व्यक्तिमत्व म्हणून ओळखले जातात. परंतू त्यांनी सकाळी सोशल मीडियात टाकलेल्या पोस्टमुळे धरणगाव शहराच्या राजकीय वर्तुळात एकच चर्चा सुरु झाली. थोड्याच वेळात ही पोस्ट मोठ्या प्रमाणावर व्हायरल व्हायला लागली.
अभिजित पाटील यांची पोस्ट जशीच्या तशी !
आमच्या समस्या —
मातोश्री नगरातील open space ही दुसर्या व्यक्तीला वापरावयास द्यावयाचा बेकायदेशीर ठराव नगरपालिकेने करावयाचा. त्याच्याविरूद्ध परिसराती ल नागरिकांनी संघर्ष करायचा की ती जागा आमच्या मुलांना खेळण्यासाठी आहे ती राहू द्या. तेव्हा तत्कालीन म.मुख्याधिकारी यांनी त्यावर सदर जागा नियमानुसार देता येत नाही असा शेरा मारला व तेव्हा तो विषय थांबला. आणि असे हे दोन वेळा घडले.
आमच्या नगरातील लोकांनी सुविधा मिळण्यासाठी मागणी केली तर काॅलनीतील कुणालाही विचारात न घेता सरळ ‘ पेव्हर ब्लाॅकचे ‘ रस्त्यांची कामे होत आहेत.
पेव्हर ब्लॉक हे रस्ते करण्यासाठी असतात की साईड पट्ट्या, चौक करण्यासाठी असतात? काँक्रीटच्या रोड पेक्षा वाहनं घसरण्याचे प्रमाण हे पेव्हर ब्लाॅकवर जास्त असते हे कोणताही प्रामाणिक इंजिनीअर ( जो आपल्या कामाशी प्रामाणिक आहे ) सांगू शकेल.
अरे बाबांनो विकास कामे करतांना गावाच्या समस्यांची priority काय ? लोकांची मागणी काय? हे तर विचारात घ्या. बहुमत जनतेने दिलं आहे ते जनतेला विचारात घेऊन काम करण्यासाठी, जनतेवर लादण्यासाठी नव्हे.
अभिजीत पाटील
(माजी शिवसेना शहरप्रमुख व माजी नगरसेवक, धरणगाव)
