चोपडा (प्रतिनिधी) जळगाव येथे मुलाकडे जाण्यासाठी निघालेल्या तालुक्यातील चुंचाळे येथील आशाबाई जिजाबराव पाटील (वय ६८) यांच्या उजव्या हातातील अंदाजे दीड लाखांची तीन तोळ्याची सोन्याची बांगडी अज्ञात चोरट्याने लंपास केल्याची घटना घडली.
दि. ७ रोजी दुपारी ३ वाजेच्या सुमारास आशाबाई पाटील ह्या ७ रोजी चुंचाळे येथील आशाबाई पाटील या आपल्या मुलाकडे जळगाव येथे जाण्यासाठी पती जिजाबराव पाटील यांच्यासोबत चोपडा बस स्थानकात आल्या होत्या. या वेळी बसमध्ये चढत असताना अज्ञात चोरट्याने या महिलेच्या हातातून तीन तोळ्याची सोन्याची बांगडी कटरच्या साह्याने कापून लंपास केल्याची घटना घडली आहे. या प्रकरणी चोपडा शहर पोलीस ठाण्यात आशाबाईंच्या फिर्यादीवरून अज्ञात चोरट्यांविरुद्ध गुन्हा दाखल करण्यात आला आहे.
दरम्यान, घटनेनंतर चोपडा शहर पोलीस ठाण्याचे पोलीस उपनिरीक्षक घनश्याम तांबे यांनी बस स्थानकात जाऊन संबंधित महिलेची विचारपूस केली. तसेच बस स्थानकांमधील सीसीटीव्ही कॅमेरे तपासले. ज्यात बसमध्ये महिला चढत असताना गर्दी होती, त्याच गर्दीच्या फायदा घेत अज्ञात चोरट्याने त्या महिलेच्या हातातून बांगडी लंपास केली.
