छत्रपती संभाजीनगर (वृत्तसंस्था) पहिली पत्नीला घटस्फोट न देता दुसऱ्या लग्नासाठी बोहल्यावर चढणाऱ्या नवरदेवाला आणि नववधूला पहिल्या पत्नीने चांगलाच धडा शिकवल्याचे प्रकरण समोर आले आहे. ही खळबळजनक घटना गुरुवारी दुपारी निपटनिरंजन भागात घडली. या प्रकरणी बेगमपुरा पोलिसांनी पतीसह दुसऱ्या पत्नीच्या नातेवाईकांविरुद्ध गुन्हा दाखल करून अटक केली आहे.
जालना जिल्ह्यातील किशोर सुधाकर गिराम (वय ३०) याचे चार वर्षापूर्वी देविका सोबत लग्न झाले होते. त्यांना एक तीन वर्षाची मुलगी देखील आहे. मात्र गेल्या तीन वर्षापासून देविका ही सतत माहेरी राहत होती. दोघांमध्ये न्यायालयात वाद देखील सुरु आहे. पत्नी नांदायला येत नसल्याने किशोर याने पहाडसिंगपुरा परिसरातील निपटनिरंजन सोसायटीतील पुजा सोबत लग्न करण्याचे ठरवले. गुरुवारी दुपारी पतीचे लग्न होणार असल्याचे कळताच देविका ही मुलीसह थेट लग्नमंडपात पोहोचली. त्या ठिकाणी देविका हिने पुजा व त्याच्या नातेवाइकासमोर ‘तु माझा नवरा असताना तु ह्या मुलीसोबत लग्न कसे काय करतो’ असे सुनावताच पुजा व तिच्या नातेवाइकांनी देविकासोबत भांडण करण्यास सुरुवात केली.
भांडण सुरु असताना देविका हिने कंट्रोलला संपर्क करून मदतीची मागणी केली. यावरुन दामिनी पथकाचे उपनिरीक्षक कांचन मिरधे, एस.पी. खरात, सोनाली निकम, राणी केदार आणि कल्पना नागरे यांनी घटनास्थळी धाव घेतली. पोलिसांनी लग्न रोखण्याचा प्रयत्न करताच किशोर गिराम, पुजा भादवे तिची आई पुजाबाई आणि तुषार संजय भादवे यांनी दामिनी पथकासोबत वाद घालून मारहाण केली. जोराची लाथ बसल्याने सोनाली निकम या खाली कोसळल्या. या घटनेमुळे परिसरात काही काळ तणाव निर्माण झाला होता. यावरुन बेगमपुरा पोलिसांनी घटनास्थळी अतिरिक्त बंदोबस्त पाठवला.
या प्रकरणी शासकीय कामात अडथळा निर्माण करून पोलिसांना मारहाण केल्याने कल्पना नागरे यांच्या तक्रारीवरुन बेगमपुरा पोलीस ठाण्यात किशोर गिराम, पुजा भादवे तिची आई पुजाबाई आणि तुषार संजय भादवे विरुद्ध गुन्हा दाखल करण्यात आला. उपनिरीक्षक सुभाष हिवराळे यांनी गुन्हा दाखल केला. याबाबतचे वृत्त आज ‘पुण्य नगरी’ने दिले आहे.
