जामनेर (प्रतिनिधी) तालुक्यातील सोनाळा येथे कपाशी व्यापाऱ्याला बंदूक आणि चाकूचा धाक दाखवून सात लाखांची रक्कम लुटण्यात आल्याची घटना घडली होती. याप्रकरणी स्थानिक गुन्हा शाखेच्या पथकाने पाच लुटारूंना मुद्देमालासह अटक केली आहे.
यासंदर्भात अधिक असे की, सोनाळा येथील संजय रामकृष्ण पाटील हे पहूर येथे कपाशीचा व्यापार करतात. काल ते नेहमीप्रमाणे सोनाळा गाव येथील राहत्या घरापासून पहूरकडे निघाले होते. सोनाळा ते सोनाळा फाटा दरम्यान सकाळी आठ वाजेच्या सुमारास तलावाजवळ थांबलेल्या दोघांनी संजय पाटील यांचे मोटरसायकल काढून घेतली. बंदूक आणि चाकूचा धाक दाखवत त्यांच्याजवळ असलेले सात लाख रुपये लुटल्याची घटना घडली होती. या प्रकरणी पहूर पोलीस स्थानकात गुन्हा दाखल करण्यात आला होता.
दरम्यान, याप्रकरणी जळगाव स्थानिक गुन्हे शाखेचे पो.नि. किरणकुमार बकाले व त्यांच्या पथकातील स.पो.नि. जालींदर पडे, पो.उ.निरी. अमोल देवडे सफी अशोक महाजन, पोहेकॉ, संदीप सावळे, पोहेको, जयंत चौधरी, पोह लक्ष्मण पाटील, पोना किशोर राठोड, पोना रणजीत जाधव, पोना श्रीकृष्ण देशमुख, पोकों, विनोद पाटील पो.कॉ. ईश्वर पाटील यांनी पाच लुटारूंना मुद्देमालासह अटक केली आहे. एलसीबीच्या पथकाने अटक केलेल्यांमध्ये गोपाळ हरी पाटील (वय ३६ सोनाळा ता. जामनेर), प्रवीण रमेश कोळी (वय २६ वाल्मिक नगर जळगाव), गोपाळ श्रवण तेली (वय ३९ कळमसरा ता. पाचोरा), प्रमोद कैलास चौधरी (वय २७ कळमसरा ता. पाचोरा), लखन दारासिंग पासी (वय ३४ रा. जुना आसोदा रोड. जळगाव) यांचा समावेश आहे. या अटकेतील आरोपींकडून ४ लाख ७४ हजार ४६० रुपये, गुन्ह्यात वापरलेले हत्यार, कट्टा, ५ मोबाईल, २ मोटार सायकली असा एकूण ५ लाख ९६ हजार ९६० रुपयांचा मुद्देमाल हस्तगत करण्यात आला आहे.
