जळगाव (प्रतिनिधी) एरंडोल येथील उपक्रमशील शिक्षक किशोर पाटील कुंझरकर यांच्या मृत्यूचे रहस्य अखेर उलगडले असून याप्रकरणी दोघांना अटक करण्यात आली आहे. अशी माहिती पोलीस अधीक्षक डॉ. प्रवीण मुंडे यांनी पत्रकार परिषदेत दिली.
एरंडोल येथील शिक्षक किशोर पाटील कुंझरकर यांचा गेल्या ९ डिसेंबर रोजी पहाटे साडेतीन वाजेच्या सुमारास जळगाव – धुळे महामार्गापासून पळासदळ रस्त्यावर अज्ञात इसमांकडून कोणत्यातरी कारणावरून खून केला होता. या खून प्रकरणी स्थानिक गुन्हे शाखेचे पोलीस निरीक्षक किरणकुमार बकाले व त्यांच्या पथकाने दोघा संशयितांना ताब्यात घेतले आहे. या प्रकरणी पोलीस अधीक्षक डॉ. प्रवीण मुंडे यांनी पत्रकार परिषद घेतली. १० डिसेंबर रोजी पहाटे किशोर पाटील कुंझरकर यांचा मृतदेह मारहाण केलेल्या स्थितीत पळासदळ संजय बक्षी येथील शिवारात आढळून आल्याने खळबळ उडाली होती. कुंझरकर हे घरातून पहाटे तीन वाजता निघाले होते. त्यानंतर थेट त्यांचा मृतदेह आढळून आला होता. या अनुषंगाने एलसीबी च्या पथकाने तपास सुरू केला होता. या तपासात सीसीटीव्हीचे फुटेज जमा करण्यात आले होते. या अनुषंगाने पोलिसांनी वाल्मीक रामकृष्ण पाटील-देवरे (वय ३२), आबा भरत पाटील – पवार (वय २५) दोन्ही राहणार सोनबर्डी, ता. एरंडोल अशा दोघांना अटक केली असून त्यांनी गुन्ह्याची कबुली दिली आहे. किशोर पाटील – कुंझरकर यांनी मृत्यूच्या दिवशी पहाटे तीन वाजता शेकोटीवर या दोघा सोबत गप्पा केल्या. यानंतर या दोघांनी कुंझरकरांना मारहाण करण्यास सुरुवात केली. ही घटना अनेकांनी पाहिली असली तरी कोणी समोर येत नव्हते. एका फुटेजमध्ये मारहाणीची घटना दिसून आली. यातूनच हा गुन्हा उघडकीस आला आहे.
