अमरावती (प्रतिनिधी) घरातून संतापात निघालेल्या काकाला रेल्वे रुळावरून वाचविण्याच्या प्रयत्नात काकासह पुतण्याचाही रेल्वेची धडक बसल्याने मृत्यू झाल्याची दुर्दैवी घटना धामणगाव रेल्वे स्टेशनजवळ घडली आहे. सुधाकर बन्सीलाल तेलंगे (५८) व मंगेश नारायण तेलंगे (२८) असे मृत काका व पुतण्याचे नाव आहे. दरम्यान, मयत मंगेशच्या पश्चात दिव्यांग वडील, वृद्ध आई, मानसिक रुग्ण बहीण दोन भाची आहेत. या सर्वांची जबाबदारी त्याच्या एकट्यावर होती.
शुक्रवारी रात्री १२ वाजेच्या सुमारास धामणगाव रेल्वे येथील रेल्वे स्टेशनजवळ मोहम्मदपुरा परिसरात राहणारे सुधाकर तेलंगे यांचा घरी काही कारणावरून वाद झाला होता. त्यामुळे ते संतापात घराबाहेर पडले. काका जीवाचे काही बरे वाईट करतील, अशी भीती वाटल्यामुळे शेजारी राहणारा पुतण्या मंगेश याने देखील काकांच्या मागे रेल्वे स्टेशनकडे धाव घेतली. ही गोष्ट मंगेशचा मित्र याने बघितली. त्यामुळे तो देखील दोघांच्या मागे पळत गेला. रेल्वे रुळावर उभ्या असलेल्या काकांना मंगेश व त्याचा मित्र ट्रॅकबाहेर खेचण्याचा प्रयत्न कर होते. त्याचवेळी मागून भुसावळ कडून नागपूरकडे जाणारी मालवाहतूक रेल्वेने त्यांना धडक दिली. त्यात या धडकेत हे दोघेही ठार झाले.
दरम्यान, मंगेश हा घरातील एकुलता एक कमावता होता. त्याच्या पश्चात पश्चात दिव्यांग वडील, वृद्ध आई आणि मानसिक आजारी असलेली बहीण व तिला असलेल्या दोन मुली आहेत. या सर्वांचा सांभाळ करण्याची जबाबदारी एकुलत्या एक मंगेशवर होती. यामुळे या मंगेशच्या कुटुंबावर दु:खाचा डोंगर कोसळला आहे.
