जळगाव, प्रतिनिधी (शहाबाज देशपांडे) – प्रशासकीय यंत्रणा थेट शेतकऱ्यांच्या बांधावर पोहोचवण्याच्या उद्देशाने जिल्हाधिकारी रोहन घुगे यांनी सोमवारी सकाळी ७ वाजता भादली बु. व असोदा येथील शेतकऱ्यांच्या शेतावर भेट देत खरीप पिकांची पाहणी केली. यावेळी त्यांनी नाविन्यपूर्ण ओवा (Ajwain) पिकाची पेरणी, विविध आंतरपिकांची लागवड तसेच शेतमाल प्रक्रिया उद्योगाची पाहणी करून शेतकऱ्यांशी संवाद साधला.
भादली बु. येथील श्री. योगेश झांबरे यांच्या शेतात ओवा पिकाची पेरणी सुरू असताना जिल्हाधिकारी रोहन घुगे यांनी प्रत्यक्ष उपस्थित राहून पिकाची पाहणी केली. यावेळी त्यांनी उपस्थित शेतकऱ्यांशी पिकांच्या विविध पद्धती, उत्पादनक्षमता आणि नाविन्यपूर्ण पिकांच्या लागवडीबाबत सविस्तर चर्चा केली. याच परिसरात मूग, उडीद, सोयाबीन आणि तूर या पिकांच्या आंतरपीक लागवडीची तसेच पिकांच्या सद्यःस्थितीची पाहणी करण्यात आली.
पीएमएफएमई अंतर्गत प्रक्रिया युनिटचा शुभारंभ
या दौऱ्यादरम्यान असोदा येथील उद्योजक श्री. दीपक प्रकाश नारखेडे यांच्या ‘माऊली ॲग्रो ट्रेडर्स’ येथे केंद्र सरकारच्या प्रधानमंत्री सूक्ष्म अन्नप्रक्रिया उद्योग योजना (PMFME) अंतर्गत उभारण्यात आलेल्या धान्य प्राथमिक प्रक्रिया युनिट व आटा प्लांटचा शुभारंभ जिल्हाधिकारी रोहन घुगे यांच्या हस्ते करण्यात आला.
या प्रकल्पामुळे परिसरातील शेतकऱ्यांच्या धान्याला स्थानिक पातळीवरच सफाई, प्रतवारी आणि प्रक्रिया करण्याची आधुनिक सुविधा उपलब्ध होणार आहे. शेतमालावर स्थानिक पातळीवर प्रक्रिया करून त्याचे मूल्यवर्धन केल्यास शेतकऱ्यांना अधिक उत्पन्न मिळण्यास मदत होईल, तसेच ग्रामीण भागात प्रक्रिया उद्योगांना चालना मिळेल.
नाविन्यपूर्ण पिकांची लागवड करण्याचे आवाहन
शेतकऱ्यांनी पारंपरिक पिकांसोबतच ओवा, चिया यांसारख्या नाविन्यपूर्ण पिकांची लागवड करून प्रयोग करावेत. तसेच शेतमालाचे केवळ उत्पादन न करता त्यावर प्रक्रिया करून मूल्यवर्धित उत्पादने तयार करावीत. यासाठी शासनाच्या पीएमएफएमई योजनेचा लाभ घेऊन प्रक्रिया उद्योग उभारण्याचे आवाहन जिल्हाधिकारी रोहन घुगे यांनी केले.
यावेळी जिल्हा अधीक्षक कृषी अधिकारी तथा प्रकल्प संचालक ‘आत्मा’ कुर्बान तडवी, कृषी विज्ञान केंद्राचे शास्त्रज्ञ डॉ. शरद जाधव, उपविभागीय कृषी अधिकारी हर्षदा देसले, तंत्र अधिकारी सतीश चांदे, तालुका कृषी अधिकारी स्नेहल थेऊरकर, मंडळ कृषी अधिकारी शरद पाटील, पोलीस पाटील राधिका ढाके यांच्यासह कृषी विभागातील अधिकारी-कर्मचारी, कृषी विज्ञान केंद्राचे प्रतिनिधी आणि शेतकरी उपस्थित होते.
