पाळधी, ता. धरणगाव – येथील पारंपरिक धार्मिक वारसा जपत दरवर्षीप्रमाणे यंदाही चैत्र चावदशीच्या निमित्ताने भवानी मातेचा यात्रा उत्सव मोठ्या उत्साहात व भक्तिमय वातावरणात साजरा करण्यात आला. संपूर्ण गावात श्रद्धा, उत्साह आणि आनंदाचे वातावरण पाहायला मिळाले.
या दिवशी काही भक्तगण भवानी मातेचे स्वरूप धारण करून गावभर फेरी काढत भाविकांना दर्शन देतात, ही अनेक वर्षांची परंपरा आहे. यावर्षी पाळधी खुर्द येथील जय भवानी मित्र मंडळाच्या वतीने भवानी मातेचे आकर्षक “पार्ट” सादर करण्यात आले. यात तीन लहान भवानी व आठ मोठ्या भवानींचा सहभाग होता.
लहान वयातील मुलांनी साकारलेल्या भवानी मातेच्या रूपांनी विशेषतः सर्वांचे लक्ष वेधून घेतले. त्यांच्या निरागस भावभावना, पारंपरिक वेशभूषा आणि भक्तिभावाने केलेले सादरीकरण पाहून भाविक भारावून गेले. या लहान भवानींनी गावकऱ्यांच्या मनावर वेगळाच ठसा उमटवला.
दरम्यान, गावातील टेकडीवरील भवानी मातेच्या मंदिरात दर्शनासाठी भाविकांनी मोठी गर्दी केली होती. दिवसभर भाविकांनी पूजाअर्चा करून दर्शन घेतले.
प्रसंगी जिल्हा परिषद सदस्य प्रतापराव पाटील यांनीही या उत्सवात सहभागी होत भवानींसोबत पारंपरिक पाचपावली खेळून वातावरणात अधिक रंगत आणली. त्यांच्या या सर्वसामान्यांमध्ये मिसळून घेतलेल्या सहभागाचे सर्वत्र कौतुक करण्यात येत आहे.
अनेक वर्षांपासून सुरू असलेली ही परंपरा जय भवानी मित्र मंडळाने जपली असून, त्यांच्या या उपक्रमाचे सर्वत्र कौतुक होत आहे. या उत्सवामुळे गावात ऐक्य, श्रद्धा आणि सांस्कृतिक जपणुकीचा सुंदर संगम पाहायला मिळाला.
