जळगाव (प्रतिनिधी) दारुच्या नशेत तर्रर्रर्र असलेल्या मद्यपी कारचालकाने आकाशवाणी चौकात नाकाबंदी दरम्यान, असलेले बैरीकेट्स तोडून तीन ते चार दुचाकीस्वारांना उडविले. ही घटना शनिवारी रात्री पावणेदहा वाजेच्या सुमारास घडली. यामध्ये दुचाकीस्वारासह पोलिस कर्मचारी गंभीर जखमी झाले, पोलिसांनी कारचालक प्रेमराज सुभाषराव वाघ (वय ३६, रा. दहीवद ता. चाळीसगाव) याला ताब्यात घेतले असून त्याच्याविरुद्ध गुन्हा दाखल करण्यात आला आहे.
नेमकं काय घडलं !
जिल्हाधिकारी कार्यालयात लिपीक असलेला प्रेमराज वाघ हे मद्यधुंद अवस्थेत (एमएच १२ एमएफ ९४८१) क्रमांकाच्या कारने भरधाव वेगाने स्वातंत्र्य चौकातून आकाशवाणी चौकात येत होता. दरम्यान, वाहतुक शाखेचे पोलीस निरीक्षक डी. डी. इंगोले, पोहेकों चंद्रकांत पाटील, योगेश पाटील, गुणवंत देशमुख, भाऊराव घेटे, किरण मराठे, विजय पाटील, पंडीत साळी हे कर्मचारी कर्तव्यावर हजर राहून आकाशवाणी चौकात बॅरीकेट्स लावून नाकाबंदी सुरु होती. भरधाव वेगात असलेल्या मद्यधुंद कारचालकाने पोलिसांचे बॅरीकेट्स तोडून समोर असलेल्या दुचाकीस्वारांना जोरदार धडक दिली. तसेच त्यांच्या पुढे उभ्या असलेल्या कारवर जावून तो आदळला. कार चालक पळून जाण्याचा प्रयत्न करीत असतांना पोलिसांनी त्याचा पाठलाग करीत त्याला सर्कलजवळ पकडले. या अपघातात ट्राफिक पोलिस कर्मचारी गुणवंत देशमुख यांच्यासह छोटू माधव बोरसे (वय ४३) व त्यांची मुलगी सिद्धी छोटू बोरसे (वय १८, रा. वाघनगर शिक्षक कॉलनी) हे गंभीर जखमी झाले. त्यांच्यावर खासगी रुग्णालयात उपचार सुरु आहे.
नागरिकांनी दिला चोप !
मद्यधुंद कार चालकाने वाहनांना धडक दिल्यानंतर तो पोलिसांसोबत हुज्जत घालीत होता. याचवेळी संतप्त झालेल्या नागरिकांनी त्याला चांगलाच चोप दिला. यावेळी पोलिसांनी त्या मद्यधुंद शासकीय कर्मचारी प्रेमराज वाघ याची सुटका करीत त्याला तात्काळ जिल्हापेठ पोलिस ठाण्यात आणले. तसेच त्याचे वाहन देखील जप्त करण्यात आले आहे.
रुग्णालयात पोलिसांनी घातली हुज्जत !
दारुच्या नशेत असलेल्या प्रेमराज वाघ यांना पोलिसांनी त्याची वैद्यकीय तपासणी करण्यासाठी त्याला जिल्हा शासकीय वैद्यकीय रुग्णालयात नेले. परंतु याठिकाणी देखील त्या मद्यधुंद कार चालक पोलिसांनी हुज्जत घालीत होता. याप्रकरणी त्याच्याविरुद्ध रात्री उशिरा जिल्हापेठ पोलिसात गुन्हा दाखल करण्यात आला आहे. बॅरीकेट्स तोडून एका मागे एक उभ्या असलेल्या दुचाकींना धडक दिल्यानंतर कार चालक पळून जात होता. संतप्त नागरिकांकडून त्याच्या वाहनाची तोडफोड केली जात होती. परंतू पोलिसांनी तात्काळ कारसह चालकाला ताब्यात घेतले.
