हिंगोली (वृत्तसंस्था) तोंडावर चटणी टाकून एका सराफा व्यापाऱ्याला लुटण्याचा प्रयत्न केला. तीन चोरट्यांनी घाई गडबडीत दागिन्यांचा डबा समजून चक्क जेवणाचाच डबा पळवला. यामुळे दागिने व रोख रक्कम सुरक्षित राहिली. तर चोरांचा मात्र, मोठा पोपट झाला.
हिंगोली येथील रिसाला बाजार भागातील रहिवासी अभिजित शंकरराव उदावंत यांचे सिरसम येथे श्री गायत्री ज्वेलर्स नावाचे दुकान आहे. १ मे रोजी ते दुकान बंद करून सायंकाळी सहा वाजेच्या सुमारास दुचाकीवर हिंगोलीकडे निघाले होते. यावेळी त्यांनी आपल्यासोबत काही पैसे आणि दागिनेही ठेवले होते. चोरांनी हे दागिने लंपास करण्यासाठी त्यांचा पाठलाग केला. सिरसम ते हिंगोली मार्गावर जोडतळा शिवारात दुचाकीवर आलेल्या तिघांनी उदावंत यांच्या डोळ्यात मिरची पूड टाकली अन् त्यांना खाली पाडले. त्यानंतर उदावंत यांच्याजवळ असलेली पिशवी घेऊन पळण्याचा प्रयत्न केला. मात्र, यात त्यांना यश आले नाही. कारण चोरट्यांनी घाई गडबडीत दागिन्यांचा डबा समजून जेवणाचाच डबा पळवला.यामुळे उदावंत यांची दागिने व रोख रक्कम सुरक्षित राहिली.
याबाबत अभिजित उदावंत यांच्या फिर्यादीवरून राजू गणेश पवार (रा. इंदिरानगर कळमनुरी), तौफिक खान सलीम खान पठाण (रा. हनुमान वॉर्ड ता. उमरखेड ) व अन्य एकाविरुद्ध बासंबा पोलिस ठाण्यात गुन्हा नोंद झाला. दरम्यान, यावेळी बासंबा पोलिसांच्या पथकाने घटनास्थळी धाव घेतली. तेव्हा ग्रामस्थांनी दोघांना पकडून पोलिसांच्या हवाली केले. तर अन्य एक जण फरार झाला. राजू गणेश पवार (रा. इंदिरानगर, कळमनुरी), तौफिक खान पठाण (रा. उमरखेड ) यांच्यासह अन्य एकाविरुद्ध गुन्हा दाखल केला आहे. पोलिसांनी दोघांना अटक केली.
