वरणगाव ता. भुसावळ (प्रतिनिधी) शुक्रवारी मध्यरात्री वरणगाव व फुलगाव येथील दहा बंद घरे फोडली आणि हाती लागेल तो मुद्देमाल व रोख रक्कम घेऊन पोबारा केला. शनिवारी सकाळी घटना उघडकीस येताच परिसरात प्रचंड खळबळ उडाली.
वरणगाव शहराच्या रेणूका नगर भागातील उत्तम देशमुख, अक्षय सोमा बोदडे, विवेक पाटील (यांचे घरातील भाडेकरू निशांत नागरे ), सुभाष तोताराम पाटील हे बाहेर गावी गेले आहेत. यामुळे चोरट्यांनी शुक्रवारी दिवसा रेकी करून व महिनाभराच्या प्रतिक्षेनंतर सुरु झालेल्या पावसाच्या रिपरिपची मध्यरात्री संधी साधून या बंद घरांना लक्ष करीत दरवाज्यांची कुलूपे तोडून घरातील काही मुद्देमाल व रोख रक्कम घेवन पोबारा केला.
वरणगाव शहराच्या नजिकच्याच फुलगांवातही चोरट्यांनी गंगाधर शिवाजी पाटील हे औषधोपचारासाठी महीनाभरापासून पूर्ण येथील आपल्या मुलाकडे गेले आहेत. याच प्रमाणे गावाच्या विविध भागातील पुष्पाबाई पंडीत पाटील, पवन मधूकर पाटील, गोपाळ जगन्नाथ कदम, हेमंत सुभाष चौधरी असे बाहेर गावी गेल्याचीही संधी चोरट्यांनी साधली. यावेळी चोरट्यांनी बंद घराचे कुलूप तोडण्यापूर्वी शेजारील रहीवाशांच्या घराला बाहेरून कडी – कोयंडा लावुन घेतले होते. ही घटना सकाळी लक्षात येताच वरणगाव शहर व फुलगावांत खळबळ उडाली.
वरणगाव व फुलगावातील काही घरांचे कुलुपे तोडण्यासाठी हेक्सा ब्लेडचा वापर केला असल्याचे घटनास्थळावर दिसुन येत आहे. तर काही कुलुपांना तोडण्यासाठी धारदार किंवा लोखंडी टॉमीच्या साहित्याचा वापर केल्याचे दिसत आहे. तर या घटने पाठोपाठ श्री क्षेत्र नागेश्वर महादेव मंदिर लगत असलेल्या साडेतीन शक्तीपीठ मंदिरातील दानपेटीही फोडण्यात आल्याचे समोर आले.
मात्र, या दानपेटीत किरकोळ रक्कम होती असे सांगण्यात येत असुन या सर्व घटनांसंदर्भात बाहेर गावी गेलेले घरमालक रात्री उशिरा पर्यंत पोलीस ठाण्यात आले नव्हते . यामुळे घटनेतील मुद्देमाल व रक्कमे संदर्भात पोलीस ठाण्यात नोंद झाली नव्हती. फुलगाव येथील भिलवाडी समोर रहीवाशी असलेले हेमंत चौधरी हे कालच (शुक्रवारी) सांयकाळी मुंबई येथील आपल्या भावाच्या घरी काही कार्यक्रमासाठी गेले असून चोरट्यांनी त्यांच्या घराचे गेट व दरवाज्याचे कुलुप तोडून घरात प्रवेश केला. व घरातील काही रक्कमेसह मुद्देमाल लंपास केला.
