जळगाव (प्रतिनिधी) दुकानाची भिंत फोडून चोरट्यांनी दुकानात प्रवेश करत ४० हजारांच्या रोकडसह २० हजारांचा सुकामेवा व मसाले चोरुन नेले. ही घटना गुरुवारी मध्यरात्रीच्या सुमारास दाणाबाजारात घडली. याप्रकरणी शहर पोलिस ठाण्यात गुन्हा दाखल करण्यात आला आहे.
शहरातील गणेश नगरात हरिचंद्र कन्हैयालाल ललवाणी (वय ५४) हे वास्तव्यास असून त्यांचे शहरातील दाणाबाजारात सतगुरु ट्रेडर्स नावाचे दुकान आहे. दिवाळी सणामुळे दुकानात सुकामेव्यासह इतर माल भरलेला आहे. दि. ९ रोजी रात्री ललवाणी हे नेहमीप्रमाणे आपले दुकान बंद करून घरी गेले. दुसऱ्या दिवशी सकाळी १० वाजेच्या सुमारास ते दुकानावर आले असता, त्यांना दुकानाच्या भिंतीला भगदाड पडलेले दिसून आले.
ललवाणी यांनी दुकानातील सामानाची पाहणी केली असता, त्यांना दुकानाच्या गल्ल्यात ठेवलेली ४० हजारांची रोकड व सुमारे २० हजार रुपये किंमतीचा सुकामेवा आणि मसाले चोरीस गेल्याचे लक्षात आले. दुकानात चोरी झाल्याची खात्री झाल्यानंतर ललवाणी यांनी लागलीच घटनेची माहिती शहर पोलीसांना दिली. त्यानुसार शहर पोलीस ठाण्याच्या कर्मचाऱ्यांनी घटनास्थळी पाहणी केली, त्यानंतर हरिचंद्र ललवाणी यांनी दिलेल्या तक्रारीवरुन शहर पोलीस ठाण्यात गुन्हा दाखल करण्यात आला आहे. पुढील तपास सहायक फौजदार बशीर तडवी करीत आहेत.
