धुळे प्रतिनिधी : साक्री तालुक्यातील बल्हाणे शिवारात चोरट्यांनी धुमाकूळ घालत एका शेतातील गोठ्यामधून तब्बल दोन लाख रुपयांचे पशुधन आणि शेतीचे साहित्य चोरून नेल्याची घटना उघडकीस आली आहे. याप्रकरणी पिंपळनेर पोलीस ठाण्यात अज्ञात चोरट्यांविरुध्द चोरीचा गुन्हा दाखल करण्यात आला आहे.
बल्हाणे येथील शेतकरी कृष्णा मनोज बिरारीस (२७) यांचे बल्हाणे शिवारात गट क्रमांक ६३/१ मध्ये शेत आहे. या शेतातील गोठ्यामध्ये त्यांनी आपले पशुधन व शेतीचे साहित्य ठेवले होते. दि. १५ रोजी रात्री ९ ते दि.१६ रोजी पहाटे ५ वाजेच्या दरम्यान, अज्ञात चोरट्यांनी संधी साधून गोठ्यात बांधलेले सुमारे १ लाख ६० हजार रूपये किमतीच्या पाच म्हशी व पारडू तसेच ४० हजाराचे रोटोवेटर असा एकूण दोन लाखांचा मुद्देमाल चोरुन नेला. याप्रकरणी कृष्णा बिरारीस यांनी दिलेल्या फिर्यादीवरून पिंपळनेर पोलीस ठाण्यात अज्ञात चोरट्याविरुध्द गुन्हा दाखल करण्यात आला आहे. तपास पोलीस उपनिरीक्षक बी.जी. शेवाळे | करीत आहेत.
