जळगाव (प्रतिनिधी) शहरातील अशोक टॉकीजच्या समोर दुचाकीवर आलेल्या चोरट्यांनी चार लाख रुपये असलेली व्यापाऱ्याची पिवशी हातोहात लांबवल्याची घटना गुरुवारी रात्री साडे आठ वाजेच्या सुमारास घडली. सीसीटीव्हि फुटेजमध्ये चोरटे कैद झाले असून चोरट्यांकडून एक तासापासून रेकी सुरु असल्याचे समोर आले आहे.
या संदर्भात संतोष हुकूमतमल राजपाल (वय ४५ रा. सिंधी कॉलनी, जळगाव) यांचे तिजोरी गल्लीत होलसेल ट्रेडर्सचे दुकान आहे. राजपाल यांनी रात्री साडे आठ वाजेच्या सुमारास दुकान बंद केले. दुकानबंद करण्याआधी त्यांनी गल्ल्यातील पैसे तसेच बाहेरून आलेली रक्कम असे साधारण ४ लाख रुपये त्यांनी पांढऱ्या कापडी पिशवीत ठेवले. यानंतर आपल्या दुचाकीवर इतर सामान आणि त्यावर पैशांची पिशवी ठेवली.
अवघ्या काही सेकंदात पिशवी लांबवली
राजपाल हे अशोक टॉकीजच्या समोर आपल्या भावाच्या दुकानावर जाण्यासाठी थांबले. त्यांनी आपली दुचाकीवर पैशांची पिशवी राहू देत समोरच असलेल्या दुकानावर जायला निघाले. दुकानाची पायरी चढत नाही तोच, एका निळ्या रंगाच्या दुचाकीवरून आलेल्या अज्ञात चोरट्यांनी हातोहात चार लाख रुपये असलेली पिशवी लांबवली. अवघ्या काही सेकंदात ही घटना घडल्यामुळे राजपाल हे गोंधळून गेलेत. राजपाल यांनी चोरट्यांचा पाठलाग करण्याचा प्रयत्न केला. परंतू त्यांना यश आले नाही. यानंतर राजपाल यांनी शहर पोलीस स्थानक गाठत फिर्याद दिली.
सीसीटीव्हीत चोरटे कैद, एक तासापासून दुकानाची रेकी
संतोष राजपाल यांनी परिसरासह स्वतःच्या दुकान आणि आपल्या बंधूंच्या दुकानासमोरील सीसीटीव्हि फुटेज चेक केले. चोरटे दोन ठिकाणी सीसीटीव्हिमध्ये कैद झाले आहेत. एवढेच नव्हे तर चोरटे साधारण एक तासापासून राजपाल यांच्या दुकानाच्या परिसरात रेकी करत असल्याचेही कळते. दरम्यान, राजपाल यांच्याकडे एवढी मोठी रक्कम आल्याची टीप चोरट्यांना कुणी दिली होती का?, या दिशेने देखील पोलीस तपासातून माहिती समोर येणार आहे.