मुंबई (वृत्तसंस्था) बुली-बाई अॅप (Bulli Bai App) प्रकरणात मुंबई पोलिसांच्या सायबर पोलिसांनी आतापर्यंत तीन आरोपींना अटक केली आहे. यातील एक आरोपी बंगळुरु तर इतर दोन आरोपी हे उत्तराखंडचे असल्याचे तपासात समोर आले आहे. विशेष म्हणजे या संपूर्ण प्रकरणाची मास्टरमाईंड ही एक १८ वर्षीय तरुणी असल्याचे समोर आल्याने अनेकांच्या भूवया उंचावल्या आहेत. यासंदर्भात आज मुंबई पोलीस आयुक्त हेमंत नगराळे यांनी पत्रकार परिषद घेऊन सविस्तर माहिती दिली.
मुंबई पोलीस आयुक्त हेमंत नगराळे बोलताना म्हणाले की, “बुली बाई अॅप प्रकरणाचा तपास गेल्या तीन दिवसांपासून सुरु आहे. अजून बराच मोठा तपास करायचा बाकी आहे. आरोपींना कुठलाही फायदा मिळू नये यासाठी काही गोष्टी गोपनिय ठेवण्यात आल्या आहेत. इंटरनेटवर वेबसाठी असलेलं बुली बाई नावाचं अॅप तयार करण्यात आलं होतं. विशिष्ठ समाजातील महिलांचे फोटो या अॅपवर अपलोड करण्यात आले होते. तसेच त्याबाबत आक्षेपार्ह्य संदेश लिहिण्यात आला होता. ३१ डिसेंबरला हे अॅप लॉन्च करण्यात आलं होतं. याप्रकरणी २ जानेवारीला गुन्हा दाखल करण्यात आला, अशी माहिती पोलीस आयुक्त नगराळे यांनी पत्रकार परिषदेत दिली.
“तक्रार प्राप्त झाल्यानंतर मुंबई पोलिसांच्या सायबर सेलनं वेगानं सूत्र हलवली. बुली बाई नावानं ट्विटर हॅन्डलही करण्यात आलं होतं. ही वेबसाईट जास्त लोकांपर्यंत पोहोचावी या उद्देशानं ही टीम काम करत होती. त्यानंतर पोलिसांच्या पथकानं याच्या फॉलोअर्सची माहिती काढली. ही वेबसाईट फक्त पाचच जण फॉलो करत होते. आतापर्यंत या प्रकरणी तीन आरोपींना अटक करण्यात आली आहे. यापैकी एक विशाल झा, दुसरी आरोपी श्वेता सिंह, तर तिसरी आरोपी उत्तराखंड येथील आहे.”
दरम्यान, या प्रकरणाचा तपास अजून सुरु असल्याचं हेमंत नगराळे यांनी सांगितलं. या संपूर्ण प्रकरणाच्या खोलाशी जाण्याचं काम मुंबई पोलिसांकडून सुरु आहे. यांसारखी प्रकरणं पुन्हा घडू नयेत, यासाठी महिला आणि मुलींना आवाहन केलं जाईल, असं हेमंत नगराळे यांनी सांगितलं आहे.
