जळगाव (प्रतिनिधी) सामाजिक सलोखा निर्माण होण्यासाठी मुस्लिम सामाजिक कार्यकर्त्यांना सुद्धा आपल्या गणेश मंडळात समावेश केल्यास त्याचा सकारात्मक परिणाम होईल, असे आवाहन एमआयडीसी पोलीस स्थानकाचे वरिष्ठ पोलीस निरीक्षक प्रतापराव शिकारे यांनी केले. ते गणेशोत्सवानिमित्त एमआयडीसी पोलीस स्थानकात नुकतीच शांतता कमिटीच्या बैठकीत बोलत होते.
दोन्ही समाजात समन्वय व सु संवाद आवश्यक- फारुक शेख
पोलीस निरीक्षक शिकारे यांच्या आवाहनास प्रतिसाद म्हणून फारुक शेख यांनी सभेत एकेश्वरवाद बाबत माहिती विशद केली. आस्था, श्रद्धा व सामाजिक सलोखा टिकवण्यासाठी दोन्ही समाजात सुसंवाद असणे आवश्यक असणे, याबाबत जोर दिला. तसेच एकमेकाच्या समाजाविषयी, धर्माविषयी, चालीरीती जाणून घेण्याविषयी जोर दिला. या प्रसंगीं हिंदू बांधवांसाठी मराठी व हिंदीतील इस्लाम धर्मा विषयीच्या पुस्तकांचे संच वाचण्यासाठी पोलीस निरीक्षक प्रतापराव शिकारे यांच्याकडे सुपूर्द करण्यात आला.
या पुस्तकांचा होता समावेश
◆ऐका आपल्या पालनकर्त्याचे (शम्स पीर जादा)
◆इस्लाम के पैगंबर मोहम्मद (के एस रामा कृष्णराव)
◆ मुक्ती मार्ग( इनामूर खान)
◆ इन्सान अपने आपको पहचान (वहीदोद्दिन खान)
◆ इस्लाम और सामाजिक न्याय , उंच – नीच, छुत – छात, शांति मार्ग ( मौलाना अबुल आला मोदी)
यांची होती उपस्थिती
पुस्तक रुपी भेट देताना फारुक शेख यांच्यासह धर्मगुरू मुफ्ती हारून नदवी, सुन्नी जामा मशीद चे ट्रस्ट अयाज अली, एम आय एम चे जिल्हाध्यक्ष अहमद सर व नगरसेवक प्रतिनिधी अक्रम देशमुख, काकर बिरादरी चे जिल्हाध्यक्ष रियाज काकर, सुप्रीम कॉलनी मशिदीचे प्रमुख सय्यद वाहेद, शाह अवलिया मस्जिद चे आसिफ शाह, नगरसेवक गणेश सोनवणे, माजी नगरसेवक सदाशिव सोनवणे एमआयडीसी पोलीस स्टेशन अंतर्गत सर्व पोलीस पाटील यांचा समावेश होता. या कार्यक्रमाचे प्रास्ताविक पो.नि. शिकारे यांनी तर आभार सहा.फौजदार विश्वास बोरसे यांनी मानले.
