मुंबई (वृत्तसंस्था) सुमारे १० दिवसांच्या राजकीय नाट्यानंतर अखेर गुरूवारी भाजपाच्या पाठिंब्यावर एकनाथ शिंदे यांनी मुख्यमंत्रिपदाची शपथ घेतली. देवेंद्र फडणवीस हे महाराष्ट्राचे नवे मुख्यमंत्री होणार आणि शिंदे उपमुख्यमंत्री होणार असं सर्वत्र चर्चा होती. मात्र, शपथविधीच्या काही वेळापूर्वी देवेंद्र फडणवीस यांनी पत्रकार परिषद घेऊन सर्वांनाच चकित केले. याच परिस्थितीत अमृता फडणवीस यांनी केलेले ट्विट सध्या चर्चेत आहे.
अमृता फडणवीस यांच्या ट्विटबद्दल चांगलीच चर्चा रंगली आहे. नेहमी अमृता फडणवीस आपल्या ट्विटमधून भावनांना वाट करून देताना दिसतात. पण हे ट्वीट अतिशय सरळ-साधे व अत्यंत औपचारिक असल्याप्रमाणे दिसून आले. ‘आपले (महाराष्ट्राचे) मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांचे मनापासून अभिनंदन आणि पुढील वाटचालीसाठी शुभेच्छा’, असे औपचारिक ट्विट करत त्यांनी दोघांचे अभिनंदन केले. देवेंद्र फडणवीसांना मुख्यमंत्री न केल्यामुळे देवेंद्र फडणवीस नाराज असल्याच्या बातम्या आल्या होत्या. भाजपच्या अनेक दिग्गज नेत्यांनी या निर्णयाला देवेंद्र फडणवीस यांचा त्याग आणि समर्पण म्हटले. अशा परिस्थितीत देवेंद्र यांच्या पत्नी अमृता फडणवीस यांनी केलेले ट्विट विशेष महत्त्वाचे ठरले आहे.
