जळगाव (प्रतिनिधी) महसूल विभागाने कारवाई करत पकडलेले वाळूचे डंपर अज्ञात चोरट्यांनी एमआयडीसी पोलीस स्थानकाच्या आवारातून चोरीला नेले होते. याप्रकरणी दोघांना अटक करण्यात आली असून डंपर जप्त करण्यात आले आहे. भूषण मंगल धनगर (रा.वैजनाथ, ता.एरंडोल), रोहित विजय सोनावणे (रा. पाळधी, रेल्वे स्टेशन) असे अटक केलेल्या संशयित आरोपींचे नावं आहेत.
यासंदर्भात अधिक असे की, २२ जून रोजी रात्री साडेदहा वाजेच्या सुमारास जळगाव तहसीलदार यांच्या पथकातील आव्हाणे येथील तलाठी मनोहर बावस्कर व ममुराबाद तलाठी वीरेंद्र पालवे यांनी तालुक्यातील विटनेर शिवारात भूषण मंगल धनगर (रा. वैजनाथ ता. एरंडोल) यांचा डंपर (क्रमांक एम.एच. ४६ एफ ३७६४) द्वारे अवैधरित्या वाळूची वाहतूक करीत असताना मिळून आल्यानंतर तलाठी यांनी दंडात्मक कारवाई होईस्तर सदरचे डंपर हे पोलीस स्थानकात जमा केले होते. त्यानुसार हे डंपर पोलीस स्थानकाच्या मागील बाजूस वाळूने भरलेल्या स्थितीत उभे होते. दरम्यान १८ ऑक्टोबर रोजी सायंकाळी सहा वाजेच्या सुमारास पोलीस निरीक्षक विनायक लोकरे आणि इतर कर्मचारी पोलिस स्टेशनच्या आवारातील जप्त मुद्दे मालाची पाहणी करीत असताना त्यांना सदर डंपर जागेवर नसल्याचे दिसून आले. यासंदर्भात पोहेका श्रीराम बोरसे यांच्या फिर्यादीवरून अज्ञात चोरट्याविरुद्ध भादवि कलम ३७९ प्रमाणे गुन्हा दाखल करण्यात आला होता. दरम्यान, पो.नि. लोकरे यांना गुप्त माहिती मिळाली की, चोरीला गेलेले डंपर हॉटेल कमल पॅराडाईसच्या मागे उभे आहे. त्यांनी तात्काळ सहा. फौजदार अतुल वंजारी, आनंदसिंग पाटील, रामकृष्ण पाटील, सचिन पाटील, मुकेश पाटील, योगेश बारी, गोविंदा पाटील, इमरान सय्यद, मुसद्दर काझी, हेमंत कळसकर,चंद्रकांत पाटील यांनी डंपर जप्त केले. तसेच डंपर चोरणारे भूषण मंगल धनगर (रा.वैजनाथ, ता.एरंडोल), रोहित विजय सोनावणे (रा. पाळधी, रेल्वे स्टेशन) या दोघांना अटक केली. आरोपींनी डंपरची दुसरी चावी आणून पोलीस स्टेशनच्या आवारातून चोरून नेले होते. पुढील तपास आनंदसिंग पाटील, योगेश बारी हे करीत आहेत.
