नांदेड (वृत्तसंस्था) धनेगाव येथील कुंडलेश्वर निवासी अपंग विद्यालयातील एका महिला कर्मचाऱ्याचे सेवानिवृत्तीपूर्वीचे २४ महिन्यांचे वेतन काढण्यासाठी ३ लाख ८० हजारांची लाच घेणारा मुख्याध्यापक आणि कोषाध्यक्षला लाचलुचपत प्रतिबंधक विभागाने सोमवारी (३ जुलै) रंगेहाथ पकडल्यामुळे खळबळ उडाली आहे. नारायण भाऊराव वाघमारे (वय ४४, मुख्याध्यापक) व अरविंद गंगाधर इंगळे (वय ३०, कोषाध्यक्ष), असे अटकेतील संशयित आरोपींचे नावे आहेत.
तक्रारदार यांच्या पत्नी ह्या नांदेड तालुक्यातील धनेगाव येथील कुंडलेश्वर निवासी अपंग विद्यालयात स्वयंपाकी म्हणून कार्यरत होत्या. त्यांनी ३१ जुलै २०२२ रोजी स्वेच्छा निवृत्ती घेतली. सेवानिवृत्ती पूर्वीचे २४ महिन्यांचे पगार काढण्यासाठी तक्रारदार व त्यांची पत्नी हे मुख्याध्यापक वाघमारे व उपाध्यक्ष बालाजी बामणे यांना भेटले. त्यांनी एकूण थकबाकी रक्कम तुमच्या बँक खात्यात पडल्यानंतर ४५ टक्के रक्कम द्यावी लागेल, असे सांगितले होते. तथापि, त्यापैकी ८ टक्के रक्कम ८३ हजार ५५१ रुपये हे थकबाकीचे बजेट मंजूर करण्यासाठी यापूर्वीच घेतली होती.
३० जून २०२३ रोजी तक्रारदार यांच्या पत्नीच्या बँक खात्यात थकबाकी रक्कम जमा झाल्यानंतर मुख्याध्यापक वाघमारे यांनी ४५ टक्के रक्कम आणून द्या, असे त्यांना फोन करून सांगितले.परंतू लाच देण्याची इच्छा नसल्यामुळे त्यांनी यासंदर्भात त्यांनी लाचलुचपत प्रतिबंधक विभागाकडे तक्रार नोंदवली. एसीबीच्या पथकाने तक्रारीची पडताळणी करत सापळा रचून आरोपींना तडजोडीअंती ठरलेले ३ लाख ८० हजार रूपये स्विकारताना अटक केली. याबाबत रात्री उशिरा गुन्हा नोंदविण्यात आला.
