पाचोड (वृत्तसंस्था) पेट्रोल आणण्यासाठी जात असताना पाठीमागून भरधाव वेगात आलेल्या अज्ञात वाहनाने जोराची धडक दिल्याने दुचाकीवरील दोघे जण जागीच ठार झाले. ही घटना पाचोड – पैठण रस्त्यावरील पेट्रोल पंपासमोर (ता. पैठण) रविवारी (दि.२९) रात्री ७.३० वाजेच्या सुमारास घडली. गोरख भाऊराव हिंगले (६०, रा. लिंबगाव ता. पैठण), छगन एकनाथ भांगळ (५८, रा. थेरगाव ता. पैठण) अशी मृतांची नावे आहेत.
गोरख हिंगले हे दिवसभर पाचोड येथे आपले कामे आटोपून घरी जात असताना यांच्या दुचाकीतील पेट्रोल अचानक संपले. त्यानंतर थेरगाव येथील छगन भांगळ यांच्यासोबत दुचाकीने (एमएच २० झे ३९६९) जात असताना पेट्रोल पंपजवळ येताच पाठीमागून भरधाव येणाऱ्या अज्ञात वाहनाने त्यांना धडक दिली. यात दोघांना गंभीर मार लागून ते जागीच ठार झाले. सदर वाहन चालकाने अंधाराचा फायदा घेऊन घटनास्थळाहून पळ काढला. रस्त्याने जाणाऱ्या वाटसरूंनी हा अपघात पाहून पाचोड पोलिसांना घटनेची माहिती दिली. यानंतर पाचोडचे सहाय्यक पोलिस निरीक्षक शरदचंद्र रोडगे, विलास काकडेसह स्थानिक नागरिक हे घटनास्थळी पोहचले. त्यानंतर दोघांना पाचोडच्या ग्रामीण रुग्णालयात दाखल केले. याप्रकरणी पाचोड पोलिसांनी आकस्मिक मृत्यूची नोंद केली आहे.
