जळगाव (प्रतिनिधी) – जून्या वादातून दोन गट पुन्हा एकमेकांना भिडले, दरम्यान दोन्ही गटाकडून एकमेकांवर दगडफेक करुन विळ्याने वार केले. यामध्ये एका गटातील तीन तर दुसऱ्या गटातील एक असे एकूण चार जण गंभीर जखमी झाले आहे. त्यांच्यावर रुग्णालयात उपचार सुरु असून त्यांनी दिलेल्या फिर्यादीवरुन दोन्ही गटातील चार जणांविरुद्ध परस्परविरोधात शनिपेठ पोलीस ठाण्यात गुन्हा दाखल करण्यात आला आहे.
नाशिक येथे शिक्षण घेत असलेला दुर्गेश चंद्रकांत सपकाळे (वय २२, रा. चौघुले प्लॉट, पार्वतीबाई ओक नगर) हा दि. २० जून रोजी त्याच्या आईला | भेटण्यासाठी आला होता. दि. २२ जून रोजी रात्रीच्या सुमारास तो आजीच्या घरी जात असतांना तेथे त्याचे काका शैलेंद्र सपकाळे व आई सुंदराबाई सोनवणे यांना चेतन सोनार याचे वडील हे मारहाण करीत होते. दरम्यान, दुर्गेश हा त्यांना सोडविण्यासाठी गेला असता, त्याच्या हाताच्या बोटावर विळ्याने वार करीत जखमी केले. तसेच भांडण सोडवित असतांना त्याच्या आत्याचा मुलगा मयुर सुखलाल साळुंखे याच्या बोटाला देखील विळा लागून खरचटले आहे. दरम्यान, जखमींना उपचारार्थ खासगी रुग्णालयात दाखल करण्यात आले आहे.
अवैधधंद्याच्या तक्रारीमुळे मारहाण
दुर्गेशचे काका माहिती अधिकार कार्यकर्ते असून त्यांनी या भागातील अवैध धंद्याबाबत जिल्हाधिकारी कार्यालयात तक्रार केली होती. त्याचा राग आल्यामुळे त्यांना मारहाण केल्याचे तक्रारीत नमूद आहे. याप्रकरणी चेतन सोनार याच्या वडीलांविरुद्ध गुन्हा दाखल करण्यात आला आहे.
दुपारच्या वादातून रात्री विळ्याने केले वार
पार्वतीबाई ओक नगरात राहणारे पितांबर तुकाराम सोनार (वय ५२) हे दि. २२ रोजी रात्रीच्या सुमारास घरी असतांना दुर्गेश सपकाळे, शैलेंद्र सपकाळे, मयुर सपकाळे हे तिघ त्यांच्या घराबाहेर आले. सोनार यांचे मुल आणि शैलेंद्र सपकाळे यांच्यात दुपारी किरकोळ वाद झाला होता. त्या कारणावरुन ते सर्व सोनार यांच्या घराजवळ आले आणि त्यांच्या पत्नीला
शिवीगाळ करीत होते. त्याचा जाब विचारला असता शैलेंद्र सपकाळे याने हातातील विळ्याने वार केले इतरांनी चापटाबुक्क्यांनी मारहाण करीत जखमी केले.
डोक्यात विळा मारुन केले जखमी
तुम्ही व तुमचे मुल जास्त मातले असून तुम्हाला सोडणार नाही असे म्हणत शैलेश सपकाळे याने विळा पितांबर सोनार यांच्या डोक्यात मारुन जखमी केले. तसेच घर जाळून टाकण्यासह जीवेठार मारण्याची धमकी दिली. जखमी सोनार यांच्यावर उपचार सुरु असून त्यांनी दिलेल्या फिर्यादीवरुन शैलेंद्र काशिनाथ सपकाळे, दुर्गेश चंद्रकांत सपकाळे, मयूर दीपक सपकाळे या तिघांविरुद्ध गुन्हा दाखल करण्यात आला आहे.
