जळगाव (प्रतिनिधी) – मुलीला जेईईसाठी ऑनलाईन क्लास शोधणाऱ्या महिलेकडून दीड लाख रुपये उकळून कोणताही क्लास घेतला नाही. त्यानंतर अन्य सायबर ठगांनी ती रक्कम परत मिळवून देतो असे म्हणत त्या महिलेकडून २१ लाख ६५ लाख रुपये उकळून महिलेची २२ लाख ७५ हजारात ऑनलाईन फसवणुक केली. ही घटना ऑक्टोंबर २०२४ ते दि. २ जून २०२६ दरम्यान घडली. याप्रकरणी पाच जणांविरुद्ध सायबर पोलिसात गुन्हा दाखल करण्यात आला आहे.
बीएसएफमधील निवृत्त जवान विनोद राजाराम सोनार (रा. अमळनेर) यांच्या पत्नी ज्योती विनोद सोनार (वय ४१) या त्यांच्या मुलीला जेईईसाठी ऑनलाईन क्लास लावण्यासाठी ऑनलाईन माहिती शोधत होत्या. त्या दरम्यान जून २०२४ मध्ये ‘आकाश बायजूस’ नावाने सचिन राठोड (रा. पुणे) याने त्यांच्यासोबत संपर्क साधून त्यांना जेईईच्या ऑनलाईन क्लासबद्दल माहिती दिली. त्यासाठी १ लाख ४५ हजार रुपये फी असून ४ हजार ६०० रुपये प्रमाणे हप्त्याने पैसे भरावे लागतील, असेही सांगितले. त्यानुसार दि. १२ जून रोजी महिलेकडून रजिस्ट्रेशन फी म्हणून २० हजार रुपये युपीआयद्वारे घेतले होते.
पैसे घेवून क्लास अन् पुस्तकेही दिली नाही
त्यानंतर दि. २ जुलै २०२४ रोजी राठोड याने पुस्तकांच्या नावाने ८ हजार रुपये घेतल्यानंतर दि. २९ ऑक्टोबर २०२४ ते दि. १८ डिसेंबर २०२५ या दरम्यान हप्ता हप्त्याने एकूण १ लाख ९ हजार ५०० रुपये ऑनलाईन स्वीकारले. मात्र पुस्तकेही दिली नाही व क्लासही घेतले नाही. त्यानंतर संबंधितांशी महिलेने वारंवार. संपर्क केला, मात्र त्यांनी प्रतिसाद ही देत नव्हते.
पैसे घेतल्यानंतर प्रतिसाद देणे केले बंद
क्लाससाठी भरलेली रक्कम गेल्यानंतर महिलेची मुलगी टेलिग्राम अॅप्लीकेशनवर आकाश बायजूस चॅनलवर माहिती घेत असताना तेथे तिची गणेश (रा. दिल्ली) नामक व्यक्तीशी ओळख झाली. त्याला तिने घडलेला प्रकार सांगितल्यानंतर तुझे पैसे दुप्पट करून देईल, अशी ग्वाही दिली. त्यासाठी त्याने वेगवेगळ्या कारणांनी महिलेकडून २ लाख ९३ हजार ९०० रुपये ऑनलाईन स्वीकारल्यानंतर त्याने देखील प्रतिसाद देणे बंद केले. पैसे परत न मिळाल्याने पोलिसात तक्रार
जेईईच्या क्लासकरीता फी च्या नावाखाली भरलेली रक्कम व अन्य चौघांनी वेगवेगळ्या कारणाने उकळलेली रक्कम परत न मिळाल्याने ज्योती सोनार यांनी दि. २३ जून रोजी सायबर पोलिस ठाण्यात फिर्याद दिली. त्यावरून सचिन राठोड, शरव पवार, गणेश, अनूज व प्रदीपकुमान मीना नावाच्या व्यक्तींविरुद्ध गुन्ह दाखल करण्यात आला आहे. तपास पोलिस निरीक्षक सतीश गोराडे करीत आहेत.
तोतया सायबर अधिकाऱ्याने उकळले १९ लाख
गणेश नामक व्यक्तीच्या मित्र अनुज याच्या क्रमांकावरून केलेल्या मोबाईलवर महिलेने संपर्क साधला. त्याने दिल्ली सायबर क्राईमध्ये माझी ओळख असल्याचे सांगून सायबर अधिकारी प्रदीप कुमार मीना नावाच्या व्यक्तीशी बोलणे करून दिले. त्या अधिकाऱ्याने तक्रार नोंदणीसाठी २ हजार, बँक व्हेरिफिकेशनसाठी ४ हजार, विड्रॉल चार्जेससाठी ३० हजार, ट्रान्सफर प्रोसेसिंग फी म्हणून ७ हजार ३६६ घेतले. त्यानंतरही ३१ डिसेंबर २०२५ ते २ जून २०२६ या दरम्यान १८ लाख ७१ हजार ७३७रुपये वेगवेगळ्या कारणांनी घेतल्याचे तक्रारीत नमूद केले आहे.
