परभणी (वृत्तसंस्था) पोहण्यासाठी जवळच्या तलावात गेलेल्या दोन विद्यार्थ्यांचा पाण्यात बुडून मृत्यू झाल्याची घटना शुक्रवारी (दि.६) सायंकाळी ६ वाजता जिंतूर तालुक्यातील पुंगळा तांडा येथे उघडकीस आली.
तालुक्यातील पुंगळा गावापासून उत्तर दिशेला पुंगळा तांडा असून तांड्याच्या बाजूलाच एक छोटासा लघु सिंचन तलाव आहे. शुक्रवारी दुपारच्या सुमारास या तलावावर पोहण्यासाठी चार ते पाच विद्यार्थी गेले होते. घटनास्थळी त्यांचे सायकल, बूट, चप्पल, कपडे आढळून आले. पोहत असताना अचानक दोन विद्यार्थी पाण्यात बुडाले ते पाण्याच्या वरती आलेच नाहीत.
सोबत पोहणाऱ्या विद्यार्थ्यांनी ही घटना घरी जाऊन त्यांच्या पालकांना सांगितली. पालक व परिसरातील नागरिकांनी तलावातील पाण्यात शोध घेऊन गोविंद संजू राठोड ( वय ९), युवराज कृष्णा चव्हाण (वय ११) या दोघांना पाण्यातून बाहेर काढले. उपचारार्थ त्यांना शहरातील ग्रामीण रुग्णालयात दाखल केले असता वैद्यकीय अधिकाऱ्याने मृत घोषित केले. या घटनेमुळे तांडा परिसरात हळहळ व्यक्त केली जात आहे.
