जळगाव (प्रतिनिधी) येथील डॉ. गाजरे रुग्नालयात एका महिलेने मुलाला जन्म दिला. मात्र प्रसृतीनंतरच्या शस्त्रक्रियेदरम्यान अतिरक्तस्त्राव झाल्याने अॅपेक्स रुग्णालयात या महिलेचा आज सकाळी मृत्यू झालाय. दरम्यान, डॉक्टरांच्या हलगर्जीपणामुळं मृत्यू झाल्याचा आरोप पूजाच्या पतीसह कुटुंबीयांनी केला आहे. तर, डॉक्टरांनी हे आरोप फेटाळून लावले आहेत.
पूजा जयप्रकाश विश्वकर्मा (वय ३०) असं मयत विवाहितेचं नाव आहे. जळगावातील गणेश कॉलनी परिसरातील श्रीकृष्ण कॉलनीत जयप्रकाश विश्वकर्मा हे वास्तव्यास आहेत. त्यांचे बजरंग बोगद्याजवळ जयेश ऑटो पार्ट्स नावाने गॅरेज आहे. जयप्रकाश यांची पत्नी पूजा हिस प्रसूतीसाठी शुक्रवारी सकाळी जळगावातील डॉ. तिलोत्तमा गाजरे यांच्याकडे दाखल करण्यात आले.
नार्मल प्रसूती होऊन मुलगा झाला, पण..
याठिकाणी नार्मल प्रसूती होऊन मुलगा झाला. त्यानंतर सायंकाळी पूजा हिची प्रकृती खालावली. त्यामुळे तिला अपेक्स रुग्णालयात दाखल करावे लागेल, असे डॉक्टरांकडून विश्वकर्मा कुटुंबीयांकडून सांगण्यात आले. त्यानुसार पूजाला अपेक्स हॉस्पिटलच्या अतिदक्षता विभागात दाखल करण्यात आले. रक्तस्त्राव थांबत नसल्याने डॉ. तिलोत्तमा गाजरे यांच्यासह इतर डॉक्टरांनी शस्त्रक्रिया केली. रात्री साडेअकरा वाजेच्या सुमारास शस्त्रक्रिया पार पडली.
बाळाचा चेहरा पाहण्याआधीच आईचा मृत्यू
पूजा हिची प्रकृती ५० टक्के चांगली असल्याचे डॉक्टरांनी सांगितले. मात्र, ४८ तासापर्यंत तिला अतिदक्षता विभागात निरिक्षणाखाली ठेवण्याचे डॉक्टरांनी सांगितले. यानंतर दोन वाजेच्या सुमारास पूजाची प्रकृती पुन्हा खालावल्याचे डॉक्टरांनी सांगितले. पती जयप्रकाश हे पाहण्यासाठी गेले असता, पूजा हिचा मृत्यू झाल्याचे समोर आले. मयत पूजा हिची दुसरी प्रसूती आहे, यापूर्वी एक मुलगा आहे. आता जन्माला आलेल्या बाळाची प्रकृती उत्तम आहे. मात्र, त्याचा चेहरा पाहण्याआधीच पूजाचा मृत्यू झाला.
डॉक्टरांच्या निष्काळजीपणामुळे मृत्यू झाला
नॉर्मल प्रसूती झाली. जन्माला आलेल्या मुलाची प्रकृती उत्तम होती. नार्मल प्रसूती असताना अचानक प्रकृती कशी खालावली. पूजाचा आधीच मृत्यू झालेला होता असा आरोप जयप्रकाश यांनी केला आहे. मात्र, डॉक्टरांनी उशिरा कळविले. मृत्यूनंतर लगेचच बिल व इतर कागदोपत्री प्रक्रिया करण्यास सांगण्यात आले. याबाबत पोलिसांत तक्रार दिली आहे. डॉक्टरांच्या निष्काळजीपणामुळे पूजाचा मृत्यू झाला असून कारवाई करावी, अशी मागणी आहे. इन कॅमेरा शवविच्छेदन करावे. त्यानंतर मृतदेह ताब्यात घेऊ, असं जयप्रकाश व त्यांच्या कुटुंबीयांनी स्पष्ट केलं आहे.
डॉक्टरांनी आरोप फेटाळले
प्रसूतीनंतर गर्भपिशवी आकुंचन पावणे गरजचे असते. मात्र पूजा हिची गर्भपिशवी पाहिजे, त्या प्रमाणात आकुंचन न पावल्याने रक्तस्त्राव झाला. अतिरक्तस्त्रावामुळे तिचा मृत्यू झाला. तिला वाचविण्यासाठी आवश्यक ते सर्व प्रयत्न केले, मात्र प्रयत्नांना यश आले नाही, असे डॉ. तिलोत्तमा गाजरे यांनी सांगितले. पूजाला वाचविण्यासाठी प्रामाणिकपणे प्रयत्न केले, पण यश आले नाही, असंही डॉक्टरांनी स्पष्ट केलं आहे.
