एरंडोल (प्रतिनिधी) जळगावहून एरंडोलकडे भरधाव वेगाने जाणारी कार व दुचाकी यांच्यात समोरासमोर झालेल्या भीषण अपघातात दोन जण जागीच ठार तर एक जण गंभीर जखमी झालाय. ही घटना पिंपळकोठा (ता. एरंडोल)नजीक सोमवारी सायंकाळी ६.३० वाजेच्या सुमारास घडली. (Erandol Accident)
नितिन जामसिंग पाटील (वय २१) आणि घन:श्याम भानुदास बडगुजर (वय २०, दोघे रा. पिंपळकोठा बुद्रुक ता. एरंडोल) अशी मृत तरुणांची नावे आहेत. यातील ज्ञानेश्वर गणसिंग पाटील (२२, रा. पिंपळकोठा बुद्रुक) हा पादचारी युवक गंभीर जखमी झाला आहे. कार जळगावहून नाशिककडे भरधाव वेगाने जात होती. या गाडीने दुचाकीस धडक दिली. यावेळी जि.प.चे माजी सदस्य नानाभाऊ महाजन, अशोक पाटील, राजेंद्र पाटील, मनोज पाटील, हरिभाऊ महाजन, अशोक बडगुजर व इतर ग्रामस्थांनी मदतकार्य केले. दरम्यान, जखमी ज्ञानेश्वर पाटील यास पुढील उपचारासाठी जळगाव येथे हलविण्यात आले असून त्याचा २१ जानेवारीला विवाह होता, अशी माहिती समोर येत आहे.
