जळगाव (प्रतिनिधी) चोरीच्या गुन्ह्यात यावल न्यायालयात तारखेवर हजर राहून माघारी परतणाऱ्या दोन बुरखाधारी महिलांनी सराफाच्या दुकानात डल्ला मारला होता. याठिकाणाहून २० ग्रॅम सोन्याचे दागिने चोरुन नेल्याची घटना घडली होती. शनिपेठ पोलिसांनी नेत्रमप्रणातील सीसीटीव्ही कॅमेऱ्यांच्या मदतीने त्या महिलांचा माग काढीत त्यांच्या मालेगावातून मुसक्या आवळीत जेरबंद केल्याची माहिती पोलीस अधीक्षक डॉ. महेश्वर रेड्डी यांनी पत्रकार परिषदेत दिली.
शहरातील सराफ बाजार पेठेतील विश्वनाथ हनुमानदास अग्रवाल (वय ६९) यांच्या गोयल ज्वेलर्स दुकानातून दोन बुरखाधारी महिलांनी दि. २८ जानेवारी रोजी २० ग्रॅम वजनाचे सोन्याचे दागिने चोरून नेले होते. याप्रकरणी शनीपेठ पोलीस ठाण्यात गुन्हा दाखल करण्यात आला होता. या घटनेचे गांभीर्य राखत शनिपेठ पोलिसांकडून या संशयित महिलांचा शोध घेतला जात होता. दरम्यान, ही संपुर्ण घटना सीसीटीव्ही कॅमेऱ्यात कैद झाल्यामुळे पोलिसांनी दुकानासह पोलिस विभागाच्या ‘नेत्रम’ कॅमेऱ्यांच्या मदतीने सीसीटीव्ही फुटेजची तपासणी केली. यामध्ये संशयित महिला चोरी करून सुभाष चौक, घानेकर चौकातून पायी जात असल्याचे दिसून आले.
या पथकाची कामगिरी
ही कामगिरी शनिपेठ पोलीस ठाण्याचे पोलीस निरीक्षक रंगनाथ धारबळे यांच्या मार्गदर्शनाखाली सहाय्यक पोलीस निरीक्षक साजीद मंसूरी, उपनिरीक्षक योगेश ढिकले, पोहेकॉ विजय खैरे, पोना किरण वानखेडे, निलेश घुगे, महिला पोकों काजल सोनवणे यांच्यासह नेत्रम विभागातील पोकॉ मुबारक देशमुख यांच्या पथकाने केली.
दोघ बुरखाधारी महिलांना शनिपेठ पोलिसांनी अटक केल्यानंतर त्यांच्याकडून चोरलेले १ लाख ४५ हजार रुपयांचे सोन्याचे दागिने हस्तगत करण्यात आले. त्यांची चौकशी केल्यानंतर त्या महिलांविरुद्ध फैजपूर पोलीस ठाण्यात चोरीचा गुन्हा दाखल असून त्याची न्यायालयात केस सुरु असून त्या तारखेला आल्या होत्या. तेथून माघारी परतत असतांना त्यांनी चोरी केल्याचे सांगितले. त्यांच्याविरुद्ध आझादनगर पोलीस ठाणे मालेगाव, कोल्हापूरी गेट पो. स्टेशन अमरावती, साक्री पो. ठाणे धुळे, चिखली पो. ठाणे बुलढाणा व शेगाव रेल्वे पोलीस ठाणे बुलढाणा याठिकाणी देखील चोरीचे गुन्हे दाखल आहेत
शोध घेत पोलिसांनी केली अटक
सराफ बाजारातून बळीराम पेठ परिसरात आलेल्या त्या बुरखाधारी महिला (एमएच १४, डीएफ ५७०३) क्रमांकाच्या चारचाकी वाहनात बसल्याचे निषन्न झाले. पोलिसांनी त्या वाहनाचा शोध घेतल्यानंतर त्या वाहन चालक मो. रफिक अहमद अन्सारी याची माहिती मिळून आली. त्याची चौकशी केल्यानंतर त्याने दि. २८ रोजी संशयित सईदा रहेमतुल्ला अन्सारी (वय ४१) व इरफाना बानो आल्लाहबक्ष शेख (वय ४४, दोघ रा. मालेगाव, जि. नाशिक) या वाहन भाड्याने घेवून त्या जळगावात आल्याचे समोर आले. त्यानुसार पालिसांनी यांचा शोध घेत त्यांना अटक केली.
