धरणगाव (प्रतिनिधी) बस स्थानकालगत असलेल्या मराठी शाळेतील लसीकरण केंद्रावर आज पहाटे साडेचार वाजेच्या सुमारास नंबर लावण्यावरून दोन तरुणांमध्ये जोरदार हाणामारी झाली. यात एका तरुणाला गंभीर दुखापत झाली असून त्याला उपचारासाठी जळगावला हलविण्यात आले आहे. दरम्यान, प्रशासनाच्या ढिसाळ कारभाराचा फटका नागरिकांना बसत आहेत.
जळगाव जिल्ह्यात कोरोनाची दुसरी लाट ओसरली असली तरी तिसऱ्या लाटेची शक्यता असल्याने नागरिकांनी कोरोना प्रतिबंधात्मक लसीकरणाला चांगला प्रतिसाद मिळत आहे. धरणगावात आज तब्बल १८ दिवसानंतर लसीकरण होणार होते. त्यामुळे पहाटे चार वाजेपासून लसीकरण केंद्रापासून तर छत्रपती शिवाजी महाराजांच्या पुतळ्यापर्यंत रांगा लागलेल्या होत्या. पहाटे साडेचार वाजेच्या सुमारास नंबर लावण्यावरून दोन तरुणांमध्ये शाब्दिक चकमक झाली. थोड्याच वेळात शाब्दिक चकमकीचे हाणामारीत रुपांतर झाले. या हाणामारीत एका तरुणाच्या नाकाचे हाड फ्रॅक्चर झाले. तर दुसरीकडे या हाणामारीमुळे नागरिक प्रचंड मनस्ताप सहन करावा लागला.
प्रशासनाच्या ढिसाळ कारभाराचा फटका नागरिकांना बसत आहेत. तरुण आणि वयोवृद्ध नागरिक एकत्र लसीकरणाला येत असल्याने मोठी गर्दी होत असून नियोजनाअभावी गोंधळ उडत आहे. याचा फटका नागरिकांना बसत असून आज दोन जणांमध्ये हाणामारी झाली. या गोंधळामुळे काही काळ लसीकरण ठप्प झाले होते. तसेच परिसरात तणाव निर्माण झाला होता. पोलीस प्रशासन आल्यानंतर काही वेळाने लसीकरण सुरू झाले. त्यामुळे सकाळी पोलीस बंदोबस्तात लसीकरण सुरू करावे लागले. पहाटे चार वाजेपासून टोकण पद्धतीने लसीकरणासाठी नंबर लावावा लागत असल्यामुळे नागरिकांमध्ये प्रचंड संतापाची लाट उसळलेली आहे. सध्या लसीकरण केंद्र एकाच ठिकाणी सुरू आहे. यामुळे तिथं प्रमाणाच्या बाहेर गर्दी होते. गर्दी वजा हाणामारी टाळण्यासाठी लसीकरण केंद्राची विभागणी तीन ते चार ठिकाणी करण्यात यावी, अशी मागणी सर्वसामान्य नागरिकांमधून होत आहे. तर दुसरीकडे पोलीस स्थानकात कुठलीही तक्रार नसल्यामुळे जखमीचे नाव कळू शकले नाही.
