छत्रपती संभाजीनगर (वृत्तसंस्था) पोळ्याचा बाजार आटोपून घरी परत येत असताना अज्ञात वाहनाच्या धडकेत पखोरा येथील दुचाकीस्वार जागीच ठार झाला. तर दुसरा गंभीर जखमी झाल्याची दुर्दैवी घटना बुधवारी (दि. १३) सायंकाळी पाच वाजेच्या सुमारास घडली. योगेश अण्णा पाठे (४०) असे मृताचे नाव आहे. तर बद्रीनाथ मुरलीधर पाठे (५५, दोघे रा. पखोरा ) हे गंभीर जखमी झाले आहेत.
गंगापूर तालुक्यातील पखोरा येथील योगेश आणि बद्रीनाथ हे दोघे दुचाकीवरून प्रवरा संगम (ता. नेवासा) येथील आठवडी बाजारातून पखोरा येथे परत जात होते. छत्रपती संभाजीनगर-पुणे महामार्गावरील कायगाव येथील गोदावरी पुलावर त्यांना अज्ञात वाहनाने धडक दिली. यामुळे त्यांची दुचाकी घसरली. यामुळे दोघेही खाली पडून गंभीर जखमी झाले. रुग्णवाहिका चालक सागर शेजवळ, शुभम वाघमारे, नंदू सातपुते यांनी जखमींना गंगापूर येथील उपजिल्हा रुग्णालयात दाखल केले. परंतू डॉक्टरांनी योगेश पाठे यांना तपासून मृत घोषित केले तर गंभीर जखमी बद्रीनाथ यांच्यावर प्रथमोचार करून पुढील उपचारार्थ छत्रपती संभाजीनगर येथे पाठवले. याप्रकरणी गंगापूर पोलीस ठाण्यात अज्ञात वाहन चालकाविरोधात गुन्हा दाखल करण्यात आला.
