मुंबई (वृत्तसंस्था) विरोधीपक्ष नेते देवेंद्र फडणवीस यांनी दिल्लीत जाऊन केंद्रीय गृहसचिवांची भेट घेतली. याच मुद्द्यावर शिवसेना खासदार संजय राऊत यांनी देवेंद्र फडणवीसांवर टीका केली आहे. ‘देवेंद्र फडणवीसांनी महाराष्ट्राची लक्ष्मणरेषा ओलांडू नये. पण जेव्हा वारंवार महाराष्ट्राचा नेता या मर्यादा ओलांडून दिल्लीकडे तोंड करून बघतो, तेव्हा सह्याद्रीही ओशाळतो”, असे राऊत म्हणाले.
प्रसार माध्यमांशी बोलताना संजय राऊत म्हणाले की, ‘रश्मी शुक्ला प्रकरणी फडणवीस तोंडावर पडले आहेत. त्यांनी दिल्लीत जाऊन गृहमंत्र्यांना भेटण्याची गरज नव्हती. त्यांनी त्यांची लढाई महाराष्ट्रातत ठेवायला हवी होती. तुम्ही फक्त नागपूरचे नेते नाहीत, तुम्ही महाराष्ट्राचे नेते आहात. आम्ही तुमच्याकडे भविष्यातील राष्ट्रीय नेते म्हणून पाहातो. त्यामुळे तुम्ही वारंवार महाराष्ट्राची लक्ष्मणरेषा ओलांडू नये. काही गोष्टी घरातच राहायला हव्यात. जेव्हा वारंवार महाराष्ट्राचा नेता या मर्यादा ओलांडतो आणि दिल्लीकडे तोंड करून बघतो तेव्हा सह्याद्रीचे शिखर ओशाळल्यासारखे वाटते, असे राऊत म्हणाले.
“देवेंद्र फडणवीस हे अनुभवी नेते आहेत. महाराष्ट्राचं मुख्यमंत्रीपद ५ वर्ष सांभाळणं हे फडणवीसांचं भाग्य होतं. तशी संधी त्यांना मिळाली. त्यातून त्यांनी उत्तम प्रकारे काम केलं. त्यातून त्यांना एक अनुभव मिळाला. हा अनुभव त्यांनी विरोधी पक्षनेते म्हणून देखील वापरायला हवा. विरोधी पक्षनेत्याने आक्रमक व्हावं. पण हा आक्रमकपणा राज्याच्या प्रतिष्ठेच्या मुळावर येईल इतका नसावा. चुका होतात. पण त्या सुधारण्याची संधी दिली पाहिजे. विरोधी पक्ष हे शॅडो कॅबिनेट असतं. विरोधी पक्षनेते हे शॅडो मुख्यमंत्री असतात. तुमच्या भाग्यात पुन्हा मुख्यमंत्री होणं असेल. पण असं ओढाताण करून ते मिळवता येत नाही”, असा टोला देखील संजय राऊत यांनी लगावला आहे.
