भुसावळ/जळगाव (प्रतिनिधी) व्यायाम शाळेसाठी निधी मंजूर झाल्यानंतर तीन लाखांचा धनादेश देण्याच्या मोबदल्यात 40 हजारांची लाच स्वीकारताना जळगाव लाचलुचपत प्रतिबंधक विभागाने पारोळा तालुक्यातील मेहू येथील सरपंच, त्यांचे पती, मुलगा व खाजगी पंटरला बेड्या ठोकल्या आहेत. लाच प्रकरणात एसीबीने एकाच कुटूंबातील तीन सदस्यांना पकडण्यात आल्याची जिल्ह्यातील पहिलीच घटना आहे. अटकेतील आरोपींमध्ये मेहू सरपंच जिजाबाई गणेश पाटील (43), सरपंच यांचा मुलगा शुभम गणेश पाटील (26, देवरे), सरपंच पती गणेश सुपडू पाटील (55) व सेतू सुविधा केंद्र चालवणारा खाजगी इसम समाधान देवसिंग पाटील (35, बोदडे) यांचा समावेश आहे.
यासंदर्भात अधिक माहिती अशी की, 47 वर्षीय तक्रारदार हे 2017-18 ते सन 2022- 23 मध्ये मेहू गावाचे सरपंच होते. यादरम्यान ग्रामपंचायत मेहू यांनी मेहू गावात व्यायाम शाळा बांधण्यासाठी काम दिले होते. या व्यायामशाळेचे बांधकाम करण्यासाठी 2023 मध्ये जळगाव जिल्हा क्रीडा अधिकारी कार्यालय यांच्यामार्फत 7 लाखांचा निधी मंजूर झाला. यावेळी आरोपी जिजाबाई पाटील यांची लोकनियुक्त सरपंच म्हणून निवड झाली . त्यानंतर तक्रारदाराने सरपंचांकडे व्यायाम शाळेच्या मंजूर निधीची मागणी संबंधित कन्स्ट्रक्शन कंपनीच्या वतीने केली. यावेळी आरोपी सरपंच पाटील यांनी आधी 4 लाखांचा धनादेश संबंधित कंपनीच्या नावाने दिला व उर्वरित 3 लाख रुपयांचा धनादेश देण्याच्या मोबदल्यात 31 जानेवारी 2025 रोजी 1 लाख व नंतर 70 हजार रुपये लाच मागितली तसेच सरपंच पती गणेश पाटील यांनी 40 हजारांची लाच रक्कम 3 फेब्रुवारी मागितली.
लाचलुचपत प्रतिबंधक विभागाने (ACB) प्राप्त तक्रारीची वेळोवेळी पडताळणी केल्यानंतर बुधवारी मेहू गावात सापळा रचला. जळगाव एसीबीचे पोलीस उपअधीक्षक योगेश ठाकूर यांच्या मार्गदर्शनाखाली पोलीस निरीक्षक नेत्रा जाधव, दिनेशसिंग पाटील, सुरेश पाटील, राकेश दुसाने, अमोल सूर्यवंशी यांच्या पथकाने सापळा रचून खाजगी पंटर समाधान पाटीलने लाच स्वीकारताच अन्य तीन आरोपींना अटक केली आहे. आरोपींकडून 10 हजार 170 रुपये जप्त करण्यात आले.
