धुळे (प्रतिनिधी) येथील एका विवाहितेवर दोन नराधमांनी तब्बल १५ वर्षे अत्याचार केल्याची धक्कादायक घटना समोर आली आहे. आरोपींनी पीडितेवर बलात्कार करतानाचा अश्लील व्हिडीओ बनवला होता. तो व्हिडीओ व्हायरल करण्याची धमकी देवून त्यांनी पीडितेवर तब्बल १५ वर्षे बलात्कार केला. याप्रकरणी मोहाडी पोलिसांनी मुख्य आरोपी नाना भदाणे याच्यासह त्याच्या एका साथीदाराविरोधात गुन्हा दाखल केला आहे.
पीडितेनं दिलेल्या तक्रारीनुसार, आरोपी नाना भदाणे याने अवधान परिसरातील एका शाळेत बांधकाम सुरू असलेल्या ठिकाणी पीडितेवर अत्याचार केला होता. यावेळी आरोपीनं पीडितेसोबत शरीरसंबंध ठेवतानाचा व्हिडीओ देखील शूट केला होता. त्यानंतर आरोपीनं संबंधित व्हिडीओ व्हायरल करण्यासाठी धमकी देत पीडितेवर अनेकदा अत्याचार केला आहे. नराधम आरोपी एवढ्यावरच थांबला नाही, तर त्याने अन्य एका साथीदाराच्या मदतीने पीडितेला नरक यातना दिल्या आहे. दोन्ही आरोपींनी पीडितेवर अनेकदा विविध ठिकाणी नेत अत्याचार केले आहे. हा संताजनक प्रकार २००६ पासून ऑगस्ट २०२१ पर्यंत सुरू होता. आरोपींनी पीडित महिला माहेरी असताना आणि तिचं लग्न झाल्यानंतर सासरी गेल्यानंतरही तिच्यावर अनेकदा अत्याचार केला आहे.
अश्लील व्हिडीओ व्हायरल झाल्यानंतर समाजात बदनामी होईल, या कारणातून पीडित महिला आरोपींचा अत्याचार निमूटपणे सहन करत होती. पण आरोपींकडून होणाऱ्या सततच्या त्रासाला कंटाळून अखेर पीडितेनं मोहाडी पोलीस ठाण्यात धाव घेत फिर्याद दाखल केली आहे. पोलिसांनी बलात्कारासह विविध कलमाअंतर्गत गुन्हा दाखल केला आहे. या घटनेचा अधिक तपास पोलीस करत आहेत.
