जळगाव (प्रतिनिधी) जळगाव शासकीय रुग्णालयातून ड्युटी संपवून भुसावळ येथे जाणाऱ्या दुचाकीस्वार अधिपरिचारीकेला मागून येणाऱ्या भरधाव वाहनाने चिरडल्याची घटना आज दुपारी अडीच वाजता जळगाव-भुसावळ दरम्यान महामार्गावर तरसोद फाट्याजवळ घडली. प्रेरणा अमोल सपकाळे (वय ३२ रा. भुसावळ) असं मृत अधिपरिचारीकेचं नाव आहे.
यासंदर्भात अधिक असे की, जळगाव शासकीय वैद्यकीय महाविद्यालय व रुग्णालयातील एस.एन.सी.यू. या वॉर्डात प्रेरणा सपकाळे या अधिपरिचारीका म्हणून कार्यरत आहेत. प्रेरणा या भुसावळ येथे कुटुंबासह राहतात. नेहमीप्रमाणे त्या आज बुधवारी दुपारी दोन वाजता ड्युटी संपल्यावर आपल्या दुचाकीवरुन (एम.एच. १९ डी.पी.३५९६) भुसावळ येथे घरी जाण्यासाठी निघाल्या होत्या. जळगाव- भुसावळ दरम्यान महामार्गावर तरसोद फाट्यावरुन जात असताना प्रेरणा यांच्या दुचाकीला मागून येणाऱ्या भरधाव डंपरने जोरदार धडक देत दुचाकीसह प्रेरणा यांना अक्षरश: चिरडले. हा अपघात इतका भीषण होता की, डंपरच्या पुढच्या चाकाखाली आलेल्या दुचाकीचा चक्काचूर झाला. या अपघातात प्रेरणा यांचा जागीच मृत्यू झाला.
अपघात झाल्यानतंर प्रेरणा यांच्या बॅगममधील कागदपत्रावरुन त्यांची ओळख पटली. अवघ्या काही क्षणातच नशिराबाद पोलीस देखील घटनास्थळी दाखल झाले. पोलिसांच्या मदतीने नागरिकांनी प्रेरणा यांचा मृतदेह जळगाव शासकीय वैद्यकीय महाविद्यालय व रुग्णालयात पाठवला. प्रेरणा यांचा मृतदेह शासकीय रुग्णालयात आणल्यानतंर त्यांच्या सहकाऱ्यांनी रुग्णलयातच आक्रोश केला. त्यानतंर आलेल्या प्रेरणा यांच्या नातेवाईकांनी हंबरडा फोडला. प्रेरणा यांच्या पश्चात आर्डनन्स फॅक्टरीत कार्यरत असलेले पती अमोल सपकाळे व चार वर्षीय मुलगा अन्वीत असा परिवार आहे. दरम्यान, घटनास्थळी आलेल्या नशिराबाद पोलिसांनी डंपर चालक मिलिंद माळी यास ताब्यात घेतलं. त्यानतंर घटनास्थळावरुन अपघातग्रस्त वाहने हलवून ती पोलीस ठाण्यात आणली. वाहतूक पोलिसांच्या मदतीने वाहतूक सुरळीत करण्यात आली.
