पुणे (प्रतिनिधी) कोथरूड परिसरातील एका महिलेला अनोळखी क्रमांकावरून पाठविलेली एपीके फाईल उघडणे महागात पडली. सायबर चोरट्यांनी तिच्या बँक खात्यातून नऊ लाखांची रोकड लांबविली. हा प्रकार रविवारी (दि. १९) उघडकीस आला.
याबाबत एका ४४ वर्षीय महिलेने कोथरूड पोलीस ठाण्यात फिर्याद दिली आहे. तक्रारदार महिला कोथरूड भागातील महात्मा सोसायटीत राहायला आहे. त्यांना अनोळखी मोबाइल क्रमांकावरून त्यांच्या मोबाइल क्रमांकावर एपीके फाइल पाठविण्यात आली. ही फाइल उघडल्यानंतर सायबर चोरट्याने त्यांचा मोबाइल
क्रमांकातील गोपनीय माहिती घेतली. या माहितीचा गैरवापर करून तक्रारदार महिलेच्या दोन बँक खात्यांमधून ऑनलाइन पद्धतीने नऊ लाख रुपये लांबविले. बँक खात्यामधून पैसे परस्पर काढण्यात आल्याचे लक्षात आल्यानंतर महिलेने कोथरूड पोलिसांकडे तक्रार दिली. अनोळखी क्रमांकावरून पाठविण्यात आलेली एपीके फाइल उघडू नका. अनोळखी क्रमांकावरून एपीके फाइलच्या माध्यमातून पाठविण्यात आलेली संदेश उघडल्यास फसवणूक होण्याची शक्यता असून, त्याबाबत नागरिकांनी सतर्कता बाळगावी, असे आवाहन पोलिसांनी केले आहे.
