जळगाव (प्रतिनिधी) – हजार रुपये प्रति महिन्याप्रमाणे २० महिने लकी ड्रॉ (भीशी) मध्ये गुंतवणुकीवर चांगला परतावा मिळण्याचे अमिष दाखवित गिता निलेश दारा (रा. सरस्वती अपार्टमेंट, आदर्शनगर) या महिलेने २० जणांची २० लाख ८ हजार रुपयात फसवणूक केली. ही घटना सप्टेंबर २०२४ ते मे २०२६ दरम्यान घडली. ही महिला अशाच पद्धतीने तीन वेगवेगळ्या पद्धतीने भिशी चालवित असल्याने तीने अनेक जणांना गंडविल्याचा संशय असून गुन्हा दाखल करण्यापुर्वीच ती महिला पसार झाली आहे. याप्रकरणी रामानंद नगर पोलिसात गुन्हा दाखल केला आहे.
शहरातील टीएम नगरात राहणाऱ्या आयुषी दीपक बुटवाणी ( रा.टीएमनगर) यांचे सिंधी कॉलनीत रेडीमेड कपड्यांचे दुकान आहे. आदर्शनगरात राहणारी संशयित गिता दारा ही महिला त्यांच्याकडे खरेदीसाठी येत होती. यावेळी त्या महिलेने बुटवाणी यांच्यासोबत ओळख करुन त्यांना भिशीतून चांगला परतावा मिळविण्याचे अमिष दाखवीत लकी ड्रॉ भिशीमध्ये गुंतवणुक करण्यास सांगितले. गीता दारा ही महिला २०२४ पासून भिशी (चिट फंड) चालवत होती. बुटवाणीसह अनेक जणांचा विश्वास संपादन केल्यानंतर त्या सर्वांनी त्या महिलेवर विश्वास ठेवून सप्टेंबर २०२४ पासून दरमहा नियमितपणे पैसे भरणे सुरू केले.
भिशी भरणाऱ्यांऐवजी नातेवाईकांचाच लागला नंबर
२०२४ मध्ये सुरु झालेली लकी ड्रॉ ची ही भिशी मे २०२६
मध्ये पूर्ण होणार होती. मात्र, संपूर्ण मुदत संपत आली तरी भिशी भरणाऱ्या कोणत्याही सामान्य सदस्याचा नंबर लागलेला नव्हता. केवळ भिशी चालविणाऱ्या गीता हिचे नातेवाईक आणि जवळच्या व्यक्तींचेच नंबर लकी ड्रॉ मध्ये निघत असल्याचे नागरिकांच्या लक्षात आले. सुरुवातीला टाळाटाळ नंतर पैसे देण्याची सांगितली तारीख भिशीमध्ये गुंतवणुक करणाऱ्या सदस्यांनी ज्यावेळेस आपल्या हक्काचे पैसे व परतावा मागितला. तेव्हा गीता हिने टाळाटाळ करण्यास सुरुवात केली. गीताला फोन केला असता, तिचा नंबरही बंद येत होता. त्याचप्रमाणे काही वेळा संपर्क झाल्यानंतर दि. २६ जून, त्यानंतर दि. ३१ जुलै रोजी पैसे दिले जातील असे गीताकडून सांगण्यात आले होते.
भिशी संपण्याआधीच गीता फरार
भिशी चालविणाऱ्या संशयित गिता दारा यांच्याकडे गुंतवणुक करणाऱ्यांनी वारंवार पैशांसाठी तगादा लावला. त्यावेळी त्यांना पाठपुरावा करुनही भिशीतील रक्कम मिळत नव्हती. दरम्यान, भिशी काढणाऱ्या काही सदस्य २३ जुलै २०२६ रोजी सकाळी गीताच्या घरी गेले. मात्र, त्या ठिकाणी गीताच्या घराला कुलूप असल्याचे दिसून आले. तिचे दोन्ही मोबाईल फोनही बंद येत होता.
पैसे देण्यापुर्वीच महिला पसार
गुंतवणुक करणाऱ्यांनी गिता दारा हीच्या काही नातेवाईकांशी संपर्क साधला असता, त्यांनाही ती कोठे गेली, हे माहिती नव्हते, गीता फरार झाल्याचे समजताच नागरिकांच्या पायाखालची जमीन सरकली, या प्रकरणी दि. २९ जुलै रोजी आयुषी दीपक बुटवाणी यांनी दिलेल्या फिर्यादीवरुन गीता दारावर गुन्हा दाखल करण्यात आला आहे. गीता हिने अशाच प्रकारे आणखीही काही भिश्या चालवल्या असून, तिने अनेकांची आर्थिक फसवणूक केल्याची शक्यता वर्तवली जात आहे.
२० जणांची झाली फसवणूक
गीताने चालविलेल्या भिशीतून २० जणांची फसवणूक झाली असून, यामध्ये ओम रविंद्र माळी (४० हजार), पुर्णिमा अनिल हसवानी (६८ हजार), मनोज दिगंबर चौधरी (२६ हजार), लक्ष्मी कारडा (४० हजार), पिंकी विजय हेमनानी (१ लाख ८ हजार), काजल संजय ललवाणी (५ लाख), चंद्रकांत रामदास जोशी (४० हजार), दिव्या भिमराव पवार (६० हजार), सुलक्षणा व शामकांत पवार (९८ हजार), निशा दिनेश ओचांनी (६० हजार), दिलीप कुमार तेओमलन (१ लाख), निलेश तुकाराम सोनवणे (२० हजार), सागर सुमित महाजन (१ लाख २८ हजार), सिमा सुनिल अडवाणी (२ लाख), सोनी दिपक घुगे (३० हजार), सविता विनोद हटकर (३० हजार), मीना राजु घुगे (३० हजार), मुस्कान वालेचा (१ लाख ७४ हजार), जय नरेश राजपाल (४० हजार), गजानन शंकर पाटील (२ लाख १३ हजार) यांचा समावेश आहे.
