चाळीसगाव ( प्रतिनिधी ) – शहरातील बसस्थानक परिसरात दिवसाढवळ्या चोरीची घटना घडल्याने खळबळ उडाली आहे. येथील बसस्थानकातून एका महिलेचे मंगळसूत्र चोरट्यांनी चोरुन पोबारा केला. तालुक्यातील काकळणे येथील प्रतिभा सुधाकर पाटील (वय ३९) या २१ एप्रिलला दुपारी १२.३० वाजता चाळीसगाव बसस्थानकावर आल्या होत्या. त्यानंतर दुपारी १.१५ वाजता त्या पारोळा येथे जाणाऱ्या बसमध्ये बसल्या. मात्र, बस पातोंडा परिसरात पोहोचताच त्यांच्या गळ्यातील सोन्याचे मणी असलेले मंगळसूत्र चोरीस गेल्याची बाब लक्षात आली. त्यानंतर त्यांनी बोरखेडा येथे बसमधून खाली उतरून घटनेची माहिती नातेवाईकांना दिली. यानंतर त्यांनी चाळीसगाव शहर पोलीस ठाण्यात धाव घेऊन सुमारे ६ ग्रॅम वजनाचे अंदाजे ४० हजारांचे मंगळसूत्र चोरी झाल्याची तक्रार दाखल केली आहे. या घटनेमुळे बसस्थानक परिसरातील सुरक्षेवर प्रश्नचिन्ह निर्माण झाले असून, नागरिकांमध्ये भीतीचे वातावरण पसरले आहे. पोलिसांनी अज्ञात चोरट्याविरुद्ध गुन्हा दाखल करून तपास सुरू केला आहे.
