जळगाव प्रतिनिधी : जागतिक श्रवण दिनानिमित्त शासकीय वैद्यकीय महाविद्यालय, जळगाव येथे ३ मार्च रोजी विशेष जनजागृती कार्यक्रमाचे आयोजन करण्यात आले होते. अधिष्ठाता डॉ. गिरीश ठाकूर यांच्या मार्गदर्शनाखाली हा सोहळा उत्साहात पार पडला.
याप्रसंगी अधिष्ठाता डॉ. गिरीश ठाकूर यांनी मूक-बधिर व श्रवणदोष असलेल्या मुलांच्या पालकांशी थेट संवाद साधला. “श्रवणदोषाचे वेळेत निदान, योग्य उपचार आणि नियमित पुनर्वसन केल्यास मुलांच्या आयुष्यात सकारात्मक बदल घडू शकतो,” असे मार्गदर्शन त्यांनी पालकांना केले. श्रवण आरोग्याकडे दुर्लक्ष न करता वेळीच डॉक्टरांचा सल्ला घेण्याचे आवाहनही त्यांनी यावेळी केले. या कार्यक्रमाला डॉ. अक्षय सरोदे सर (सहयोगी प्राध्यापक, कान-नाक-घसा विभाग), डॉ. ललित राणे सर (सहाय्यक प्राध्यापक), डॉ. इम्रान पठाण (अतिरिक्त वैद्यकीय अधीक्षक), डॉ. विनोद पवार, डॉ. शब्बीर राजा, मुनझ्झा शेख (ऑडिओलॉजिस्ट) उपस्थित होते.
चित्रकला स्पर्धा आणि आनंदोत्सव
कार्यक्रमाचे खास आकर्षण म्हणजे श्रवणदोष असलेल्या मुलांसाठी आयोजित केलेली चित्रकला स्पर्धा. मुलांनी आपल्या कल्पकतेने कागदावर रंग भरत या स्पर्धेत मोठ्या उत्साहाने सहभाग नोंदवला. कार्यक्रमाच्या शेवटी सर्व मुलांना मिठाई वाटप करण्यात आली, ज्यामुळे मुलांच्या चेहऱ्यावर एक वेगळाच आनंद ओसंडून वाहत होता. केवळ उपचारच नव्हे, तर अशा मुलांना समाजात मानाचे स्थान मिळावे आणि त्यांच्या पालकांमध्ये आत्मविश्वास निर्माण व्हावा, हा या उपक्रमाचा मुख्य उद्देश होता. या कार्यक्रमातून श्रवण आरोग्याविषयी जनजागृती करण्याचा आणि मुलांना प्रोत्साहन देण्याचा यशस्वी संदेश देण्यात आला.
