मुंबई (वृत्तसंस्था) दिशा सालियन प्रकरणात गुन्हा दाखल झालेले भाजपचे केंद्रीय मंत्री नारायण राणे आणि त्यांचे सुपूत्र नितेश राणे (Nitesh Rane) यांचा आता पोलिसांकडून जबाब नोंदवला जाणार आहे. त्यापूर्वी नितेश राणे यांनी एक सूचक ट्विट केले आहे. खेल आपने शुरू किया है, खतम हम करेंगें. न्याय मिलेगा!, असे नितेश यांनी ट्विटमध्ये म्हटले आहे.
‘खेल आपने शुरु किया है, हम खत्म करेंगे, न्याय मिलेगा’ असं म्हणत दिशा सालियन प्रकरणी नितेश राणेंनी ट्वीट केलं आहे. सुरुवात तुम्ही केलीय, शेवट आम्ही करणार असं सांगत नितेश राणेंनी #JusticeForDishaSalian असा हॅशटॅग देत ट्वीट केलं आहे. विशेष म्हणजे आजच केंद्रीय मंत्री नारायण राणे आणि नितेश राणे यांना आज चौकशीसाठी दुपारी १ वाजता हजर राहावं लागणार आहे. दिशा सालियनबद्दल आक्षेपार्ह वक्तव्यप्रकरणी त्यांना कोर्टाने १० मार्चपर्यंत अटकेपासून दिलासा दिला आहे. दिशाच्या कुटुंबीयांनी राणे पितापुत्रांनी विरोधात तक्रार केली आहे त्या प्रकरणात आज नारायण राणे आणि नितेश राणे पोलीस स्टेशनमध्ये हजेरी लावतील.
दिशा सालियनवर अत्याचार करुन तिची हत्या करण्यात आल्याचं वक्तव्य नारायण राणेंनी पत्रकार परिषदेत केलं होतं. त्यानंतर तिच्या पालकांनी नारायण राणे आणि नितेश राणेंविरोधात पोलीस ठाण्यात तक्रार केली होती. या संदर्भात महिला आयोगाचा अहवाल प्राप्त झाल्यानंतर नारायण आणि नितेश राणेंविरोधात मुंबईच्या मालवणी पोलीस ठाण्यात गुन्हा नोंदवण्यात आला आहे. त्यानंतर आता त्यांची या वक्तव्याप्रकरणी चौकशी करण्यात येणार आहे.
केंद्रीय मंत्री नारायण राणे यांनी केलेल्या वक्तव्याप्रकरणी दिशा सालियनच्या आई-वडीलांनी राज्य महिला आयोगाकडे तक्रार दाखल केली होती. राणेंच्या आरोपांमुळे दिवगंत दिशाची नाहक बदनामी होत असल्याचे त्यांनी तक्रारीत म्हटले होते. त्यानंतर राज्य महिला आयोगाने मालवणी पोलीस ठाण्याकडून दिशाच्या मृत्यू प्रकरणाचा अहवाल मागितला होता.
