जळगाव (प्रतिनिधी) – टास्क पूर्ण करून त्यातून मोठा परतावा देण्याचे अमिष दाखवून राष्ट्रीय सांख्यिकी कार्यालयात सर्वे प्रगणक असलेले रणजित दशरथ पवार (वय ३०, रा. ढेकू बुद्रुक तांडा, ता. अमळनेर) यांची ६ लाख ४५ हजार ९०९ रुपयांमध्ये फसवणूक करण्यात आली. याप्रकरणी सायबर पोलीस ठाण्यात ऑनलाईन ठगाविरुद्ध गुन्हा दाखल करण्यात आला आहे.
जळगावातील राष्ट्रीय सांख्यिकी कार्यालयात सर्वे प्रगणक म्हणून नोकरीस असलेले रणजित दशरथ पवार (वय ३०, रा. ढेकू बुद्रुक तांडा, ता. अमळनेर) यांना दि. १३ जुलै रोजी मेसेज आला व टेलिग्राम चॅनल ग्रुपला अॅड होण्यास सांगितले. कंपनीत गुंतवणूक केलेल्या रकमेवर ५० टक्के परतावा मिळण्याचे अमिष दाखविण्यात आले. त्यासाठी दिलेल्या टास्कसाठी त्यांनी सुरुवातीला ३० हजार रुपये गुंतविले. त्यांना पुन्हा एक टास्क पूर्ण करण्यास सांगितल्याने त्यांनी ५६ हजार ६७५ रुपये पाठविले. नफा मागितल्यानंतर त्यांना तिसरा टास्क पूर्ण करण्यासाठी सांगितल्याने त्यांनी पुन्हा ९८ हजार ९०० रुपये त्यांच्या भावाच्या खात्यावरून पाठविले.
वेळोवेळी उकळले साडेसहा लाख रुपये
त्यांना नफा न देता वारंवार टास्क पूर्ण करण्यास सांगितल्याने त्यांनी वेळोवेळी एकूण ६ लाख ४५ हजार ९०९ रुपये पाठविले. त्यांनी भरलेली रक्कम परत मागितल्याने ते अजून पैशाची मागणी करू लागले. फसवणूक झाल्याचे लक्षात आल्यानंतर रणजित पवार यांनी सायबर पोलिस ठाण्यात फिर्याद दिली. त्यावरून गुन्हा दाखल करण्यात आला आहे.
