भुसावळ ( प्रतिनिधी ): शहरात एका २७ वर्षीय तरुणीची तब्बल १० लाख रुपयांची आर्थिक फसवणूक करून, तिला लग्नासाठी दबाव टाकत विनयभंग केल्याचा गंभीर व धक्कादायक प्रकार समोर आला आहे. या प्रकरणी भुसावळ बाजारपेठ पोलीस ठाण्यात गुन्हा दाखल करण्यात आला आहे.
तक्रारदार तरुणी भुसावळ शहरातील एका भागात आपल्या कुटुंबासह वास्तव्यास आहे. प्राप्त माहितीनुसार, सिद्धांक मनोज हेडा (रा. गंगाराम प्लॉट, भुसावळ) व्या संशयिताने सन २०२० मध्ये तरुणीशी ओळख निर्माण केली. ओळखीचा फायदा घेत आरोपीने तिचा विश्वास संपादन केला व शेअर मार्केटमध्ये अधिक नफा मिळवून देण्याचे आमिष दाखवून तिची आर्थिक फसवणूक केली. तसेच संशयिताने तरुणीच्या डी-मॅट खात्याची गोपनीय माहिती मिळवून तसेच तिच्या क्रेडिट कार्डचा गैरवापर करून सुमारे १० लाख रुपयांची रक्कम लुबाडल्याचे तक्रारीत नमद आहे. यानंतर आरोपीने तरुणीवर लग्नासाठी सतत दबाव टाकण्यास सुरुवात केली. तिने विरोध केल्यानंतरही आरोपीने तिचा मुंबई ते मंगलोरपर्यंत पाठलाग केल्याचा गंभीर आरोप आहे.
चाकूचा धाक दाखवत विनयभंग प्रकरण अधिक गंभीर बनत असताना आरोपीने तक्रारदाराच्या घरात बेकायदेशीर प्रवेश करून चाकूचा धाक दाखवत तिचा विनयभंग केला. याशिवाय तिचे खासगी फोटो मॉर्फ करून ते सोशल मीडियावर अपलोड करण्याची धमकी देत मानसिक त्रास दिल्याचेही तक्रारीत स्पष्ट करण्यात आले आहे.
त्रासाला कंटाळून तक्रार
या सातत्यपूर्ण मानसिक, आर्थिक व शारीरिक त्रासाला कंटाळून अखेर तरुणीने भुसावळ बाजारपेठ पोलीस ठाण्यात धाव घेत तक्रार दाखल केली. पोलिसांनी आरोपीविरुद्ध संबंधित गंभीर कलमान्वये गुन्हा नोंदवला असून आरोपीचा शोध घेण्यासाठी विशेष पथकाद्वारे तपास सुरू करण्यात आला आहे.
